Фёдараў Яўген Аляксандравіч нарадзіўся 15 студзеня 1897 года ў г. п. Відзы Браслаўскага раёна, рускі савецкі пісьменнік.

Дзяцінства прайшло па-за межамі Беларусі – на Паўднёвым Урале, што абумовіла тэмы яго творчасці. Атрымаў пачатковую адукацыю ў школе і ў ваенна-тапаграфічным вучылішчы, якое скончыў у 1918 годзе.

Удзельнік Грамадзянскай вайны, ваяваў на Заходніх і Усходніх франтах. У 1922–1932 гг. займаў значныя пасады ў народнай гаспадарцы – кіраваў землеўпарадкаваннем у Сталінградзе, Віцебску, быў дырэктарам зямельных трэстаў у Горкім, Растове-на-Доне, Ленінградзе. Адначасова займаўся літаратурнай працай, у розныя гады супрацоўнічаў з газетамі «Деревенская коммуна» (Ленінград), «Витебские известия», друкаваўся ў розных выданнях з 1916 года.

У 1931 годзе скончыў экстэрнам Маскоўскі інстытут землеўпарадкавання. У даваенны перыяд некалькі гадоў працаваў старэйшым навуковым супрацоўнікам АН СССР, стаў прафесійным пісьменнікам, увайшоў у Саюз сялянскіх пісьменнікаў, з 1937 года ўвайшоў у Саюз савецкіх пісьменнікаў.

3 самага пачатку Вялікай Айчыннай вайны добраахвотнікам пайшоў на фронт. Ваяваў на паўночна-заходнім кірунку, быў у партызанскіх злучэннях, удзельнічаў у прарыве блакады Ленінграда.

Асноўныя тэмы твораў – гісторыя Урала і Сібіры, Грамадзянская вайна – трылогія «Каменный пояс», «Ермак» і інш.

Узнагароджаны ордэнамі Айчыннай вайны II ступені, Працоўнага Чырвонага сцяга.

Памёр Яўген Аляксандравіч 2 сакавіка 1961 года ў Ленінградзе.

ЛІТАРАТУРА

1. Таленавіты пісьменнік // Віцебскі рабочы. – 1957. – 20 студз. – С. 3.

2. Фёдараў Яўген Аляксандравіч // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 290–291.

3. Фёдараў Яўген Аляксандравіч // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 171–172.

4. Фёдараў Яўген Аляксандравіч // Памяць: Браслаўскі раён : гісторыка-дакументальныя хронікі гарадоў і раёнаў Беларусі / рэдкал.: К. В. Велічковіч [і інш.] ; уклад. К. С. Шыдлоўскі ; мастак Э. Э. Жакевіч. – Мінск : Паліграфафармленне, 1998. – С. 595.

5. Яны абаранялі горад Леніна // Віцебскі рабочы. – 1974. – 29 студз. – С. 2.

6. Яўген Аляксандравіч Фёдараў // Браслаўская звязда. – 2004. – 26 чэрв. – С. 5.