Халіп Уладзімір Трафімавіч нарадзіўся 7 верасня 1939 года ў в. Двор Пліна Ушацкага раёна. Беларускі драматург, тэатразнаўца, кандыдат мастацтвазнаўства (1975).

Скончыў Беларускі дзяржаўны ўніверсітэт (1963). З 1970 года – інструктар ЦК КПБ, галоўны рэдактар Дзяржкіно БССР. З 1981 года працаваў на кінастудыі «Беларусьфільм».

Аўтар манаграфіі «Радок, прачытаны тэатрам», прысвечанай праблемам інсцэнізацыі празаічных твораў у тэатрах Беларусі, кінасцэнарыяў мастацкіх фільмаў «Полымя» (з Г. Бураўкіным, Ф. Коневым), «Мама, я жывы!», тэлефільма «Нас выбраў час» (з А. Петрашкевічам), дакументальных фільмаў «Брэсцкая крэпасць», «Тры колеры радасці», «Я салдат Брэсцкай крэпасці», «Чырвоны сшытак», «Саюз рэспублік і сэрцаў», лібрэт опер «Джардана Бруна» (пастаўлена Дзяржаўным тэатрам оперы і балета БССР), «Матухна Кураж» (Малдаўскі тэатр оперы і балета і Каўнаскі музычны тэатр), п'есы «Цень гары» (пастаўлена ў 1987 годзе Нацыянальным акадэмічным драматычным тэатрам імя Я. Коласа).

Выступае ў перыядычным друку па праблемах тэатра і кіно.

ЛІТАРАТУРА

1. Варатынская, Г. З плінскай вясковай сцяжыны... / Г. Варатынская // Патрыёт (Ушачы). – 2009. – 31 кастр. – С. 3.

2. Варатынская, Г. Кінематаграфіст з Ушаччыны / Г. Варатынская // Патрыёт (Ушачы). – 2004. – 22 снеж. – С. 4.

3. Халіп Уладзімір Трафімавіч // Памяць: Ушацкі раён : гісторыка-дакументальныя хронікі гарадоў і раёнаў Беларусі / рэдкал.: Г. К. Кісялёў [і інш.] ; уклад. М. М. Кірпіч ; мастак Э. Э. Жакевіч. – Мінск : Белта, 2003. – С. 553.