Хазанскі Уладзiмiр Якаўлевiч нарадзiўся 25 кастрычнiка 1923 года ў г. Гарадок. Журналіст, пісьменнік, лаўрэат прэміі Ленінскага камсамола БССР.

У лiпенi 1941 года сям'я Хазанскіх эвакуіравалася ў Алапаеўскi раён Свярдлоўскай вобласцi. Уладзiмiр Якаўлевіч паступiў вучыцца на факультэт журналiстыкi Свярдлоўскага дзяржаўнага ўнiверсiтэта, але пасля смерцi бацькi ў сувязi з цяжкiмi матэрыяльнымi ўмовамi быў вымушаны пакiнуць вучобу. Працаваў мантажнiкам, грузчыкам на заводзе. У вераснi 1942 года зноў пачаў вучыцца i, атрымаўшы дыплом, па накiраваннi ЦК ВКП(б) вярнуўся ў родную Беларусь. Працаваў журналістам у газетах «Савецкая Беларусь» і «Віцебскі рабочы».

У 1949 годзе журналiст Хазанскi быў залiчаны ў штат «Чырвонай змены», адпрацаваў уласным карэспандэнтам па Вiцебскай вобласцi больш за 40 гадоў.

У 1972 годзе Уладзiмiр Якаўлевiч стаў лаўрэатам прэмii Ленiнскага камсамола БССР – за шматгадовую працу ў камсамольскiм друку.

Аўтар дакументальных аповесцей «Ася», «Спытайце ў бяроз», якія расказваюць пра падпольшчыкаў г. Полацка і ўдзельнікаў Прошкаўскага інтэрнацыянальнага падполля.

Разам з артыстам тэатра імя Я. Коласа А. Гутковічам напісаў п'есу «Юныя мсціўцы», якая ставілася ў тэатрах Віцебска, Магілёва, Мінска.

Памёр Уладзімір Якаўлевіч Хазанскі 20 лiстапада 1989 года.

ЛІТАРАТУРА

1. Лыскавец, В. Пошукі і знаходкі журналіста / В. Лыскавец // Віцебскі рабочы. – 1973. – 8 жн. – С. 4.

2. Матеюн, А. Ни дня без строчки / А. Матеюн // Витебские вести. – 2013. – 26 окт. – С. 11.

3. Монолог о друге // Краеведческие очерки и статьи / М. Рывкин ; сост., предисл., примеч. А. М. Подлипского. – Витебск : Витебская областная типография, 2011. – С. 60–62.

4. Рывкин М. Монолог о друге / М. Рывкин // Мишпоха. – 1995. – № 1. – С. 49–51.

5. Хазанскі Уладзімір Якаўлевіч // Памяць: Гарадоцкі раён : гісторыка-дакументальныя хронікі гарадоў і раёнаў Беларусі / рэдкал.: Н. А. Бурунова [і інш.] ; уклад. С. І. Садоўская ; мастак Э. Э. Жакевіч. – Мінск : Беларусь, 2004. – С. 720–721.

СПАСЫЛКІ

 Ганарыўся працай у «Чырвонцы»

 Хазанскі Уладзімір Якаўлевіч. Нашы землякі. Городокская сеть публичных библиотек