Мальчэўская Яўгенія (Крыжаноўская Яўгенія Еўдакімаўна) нарадзілася 25 жніўня 1949 года ў в. Замошша Чашніцкага раёна ў сялянскай сям'і.

Вучылася спачатку ў Замошскай пачатковай школе, потым у Заслонаўскай сярэдняй школе. Пасля паступіла ў Бабруйскі тэхнікум гумавай прамысловасці (1965), пасля заканчэння якога (1969) атрымала спецыяльнасць тэхніка-тэхнолага і працавала прэсаўшчыцай-вулканізатаршай на Бабруйскім заводзе гумавых вырабаў.

У 1970 года прызначана карэктарам рэдакцыі бабруйскай аб'яднанай газеты «Камуніст», у 1972–1973 гг. – супрацоўнік рэдакцыі Чашніцкай раённай газеты «Чырвоны прамень», у 1973–1978 гг. вучылася на беларускім аддзяленні філалагічнага факультэта БДУ. Пасля яго заканчэння накіравана на працу ў Равінічы (Чэрвеньскі раён), дзе выкладала ў школе беларускую мову і літаратуру.

У 1980 годзе пераехала з мужам на Віцебшчыну і працавала ў школе працоўнай моладзі.

З 1987 года выкладала беларускую мову ў талачынскай СШ, з 1989 года – у віцебскай СШ № 40. Член Саюза Пісьменнікаў СССР з 1990 года.

Першыя вершы Яўгеніі Мальчэўскай «Залатая мяцеліца», «Серабрыліся ля хат таполі» з'явіліся ў 1969 годзе ў газеце «Магілёўская праўда». Затым яе вершы змяшчаліся ў калектыўных зборніках «Вёсны», «Нашчадкі», «Любі будзены дзень», «Дзень добры, мама», «Дзень паэзіі» ў раённым, абласным, рэспубліканскім друку.

Аўтар паэтычнага цыкла «Святло асенняе зярнят». Асноўныя тэмы ў яе вершах – любоў да Радзімы і народа, пачуццё кахання, сяброўства, узаемаадносіны паміж людзьмі.

З'яўляецца аўтарам апавяданняў «Мачаха», «Яраслаўна».

Памёрла Яўгенія Мальчэўская 18 студзеня 2008 года.

ЛІТАРАТУРА

1. Дзеячы культуры і навукі – ураджэнцы Чашніччыны // Гістарычна-краязнаўчы курс «Наша Чашніччына». Чашніказнаўства / В. В. Грыбко. – Мінск : Медисонт, 2007. – С. 138–149.

2. Казакевіч, З. «Будзе толькі памяць...» / З. Казакевіч // Витебский проспект. – 2010. – 25 февр. – С. 23.

3. Мальчэўская Яўгенія // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.] ; маст. рэд. В. Г. Загародні. – Мінск : БелЭн, 1995. – Т. 4 : Лазарук–Перкін. – С. 203–204.

4. Мальчэўская Яўгенія // Пісьменнікі Віцебшчыны : даведнік / рэд. Ф. І. Сiўко. – Віцебск : Віцебская абласная друкарня, 2001. – С. 48–50.

5. Яўгенія Мальчэўская // Старонкі творчых біяграфій / А. М. Канапелька. – Віцебск : ВДУ імя П. М. Машэрава, 2003. – С. 70–71.