Маралёўскі Юзаф нарадзіўся 5 сакавіка 1777 года ў г. Гарадок Гарадоцкага павета (зараз Гарадоцкі раён). Беларускі паэт, педагог.

У 1790 годзе скончыў клас рыторыкі ў Аршанскім езуіцкім калегіуме. У 1790–1792 гг. далучыўся да Таварыства Ісуса і паступіў у Полацкі навіцыят. Вывучаў французскую мову ў Полацкім (1792–1793) і рыторыку ў Аршанскім (1793-1794) езуіцкіх калегіумах. Выкладаў у езуіцкіх калегіумах Мсціслава (1794–1795), Магілёва (1795–1796), Оршы (1796–1797).

У 1797 годзе вярнуўся ў Полацкі езуіцкі калегіум, дзе вывучаў філасофію (1797–1799) і тэалогію (1800–1804), потым выкладаў філасофію (1799–1800) і французскую мову (1800–1802 і 1803–1804).

У 1804–1810 гг. – выхавацель езуіцкага пансіёна, прафесар паэзіі і рускай мовы ў Санкт-Пецярбургу.

У 1810–1814 гг. – прафесар рыторыкі ў настаўніцкай семінарыі і прэфект манастырскай бібліятэкі ў Оршы.

У 1814–1816 гг. – сакратар ордэна езуітаў беларускай правінцыі, у 1816–1818 гг. – кіраўнік Полацкай акадэміі. У 1818 годзе пераехаў на Валынь.

Пасля выгнання езуітаў з Расійскай імперыі ў 1820 годзе накіраваўся ў Аўстрыйскую дзяржаву. Са студзеня 1822 года – намеснік правінцыяла Галіцкай правінцыі Таварыства Ісуса, а з кастрычніка 1828 па студзень 1835 гг. – рэктар езуіцкага калегіума ў Тынцы і Новым Сончы. У 1835 годзе пераехаў на працу ў Старую Весь, дзе з лістапада 1836 па лістапад 1840 гг. працаваў рэктарам калегіума.

Друкаваўся ў часопісах «Полацкі штомесячнік», «Веснік Еўропы». Творчасць Маралёўскага выяўляла характэрныя рысы літаратуры часоў пераходу ад класіцызму да рамантызму. Адначасова з класіцыстычнымі трэнамі, элегіямі, эпіграмамі, панегірыкамі, наследаваннямі Гарацыю пісаў у перадрамантычным стылі лірычныя песні, у якіх з агульнагуманістычных і хрысціянскіх пазіцый разважаў пра выхаваўчае значэнне паэзіі. Выказваў замілаванне да прыроды і роднага краю.

Пісаў на польскай, лацінскай, рускай мовах.

Памёр Юзаф Маралёўскі 12 жніўня 1845 года.

ЛІТАРАТУРА

1. Мархель, У. І. Маралёўскі Юзаф / У. І. Мархель // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2000. – Т. 10 : Малайзія–Мугаджары. – С. 104.

2. Мархель, У. І. Маралёўскі Юзаф / У. І. Мархель // Мысліцелі і асветнікі Беларусі : энцыклапедычны даведнік / гал. рэд. Б. І. Сачанка [і інш.]. – Мінск : БелЭн, 1995. – С. 490.

3. Мархель, У. І. Юзаф Маралёўскі / У. І. Мархель // Памяць: Гарадоцкі раён : гісторыка-дакументальныя хронікі гарадоў і раёнаў Беларусі / рэдкал.: Н. А. Бурунова [і інш.] ; уклад. С. І. Садоўская ; мастак Э. Э. Жакевіч. – Мінск : Беларусь, 2004. – С. 154.