Міронаў Аляксандр Яўгенавіч нарадзіўся 23 лістапада 1910 года ў г. Оршы ў сям'і чыгуначніка. Скончыўшы сямігодку, А. Міронаў вучыўся на агульнаадукацыйных курсах у Мінску. У 1928 г. адначасова з вучобай працаваў рабочым на будаўніцтве, з 1933 г. рэпарцёрам рэспубліканскай газеты «Звязда». Але юнака вельмі прыцягвала мора, і летам 1930 г. ён паехаў у Архангельск, уладкаваўся матросам 1-га класа савецкага гандлёвага флоту. Плаваў на суднах «Малыгін», «Валадарскі», «Смідовіч», «Чалюскін», удзельнічаў у Чалюскінскай эпапеі (1933–1934). Некаторы час працаваў у рэдакцыях газет «Правда Севера», «Моряк Севера» (1930–1941). Калі пачалася Вялікая Айчынная вайна, А. Міронаў скончыў паскораную школу камандзіраў баявога карабля, служыў на Паўночным флоце. Пасля дэмабілізацыі (1946) вярнуўся ў Мінск, працаваў уласным карэспандэнтам газеты «Звязда» (1946–1947), адказным сакратаром альманаха «Советская Отчизна», начальнікам сцэнарнага аддзела кінастудыі «Беларусьфільм» (1947–1950). 3 1950 г. на творчай рабоце. Узнагароджаны 2 ордэнамі Чырвонай Зоркі, ордэнамі Айчыннай вайны 2-й ступені, «Знак Пашаны», «Дружбы народаў», медалямі, Ганаровымі граматамі Вярхоўнага Савета БССР. Ганаровы палярнік Савецкага Саюза. Заслужаны работнік культуры БССР (1978).

Друкавацца пачаў ў 1930-х г. (у беларускім друку – з 1934 г.). Пісаў нарысы, апавяданні, аповесці, раманы і п'есы, прысвечаныя пераважна жыццю, працы і подзвігам савецкіх маракоў («Паход Чалюскіна», «Ля студзёнага мора», «У чужых шыротах», «Па марах, па акіянах», «Толькі мора вакол» і інш.). Пісьменнік добра ведаў побыт сваіх таварышаў па працы і ваеннай службе. У яго творах шмат з перажытага, уласнага жыццёвага вопыту. Пісаў для дзяцей («Чэснае піянерскае», «Сцяг карабля», «Гэта твае сябры» і інш.). Многія яго апавяданні і нарысы прысвечаны тэме рабочага класа. Займаўся перакладамі. У літаратурнай апрацоўцы А. Міронава за пасляваенныя гады выйшлі многія кнігі ўдзельнікаў Вялікай Айчыннай вайны. Аўтар аповесці-ўспамінаў «Дзед Маўр». На словы А. Міронава напісаны песні («Зубронак» П. Падкавырава і інш.).

Жыў у Мінску і Кактэбелі (Крым).

Памёр 15 снежня 1992 года.

ЛІТАРАТУРА

1. Аляксандр Міронаў // Беларускія пісьменнікі (1917–1990) : даведнік / склад. А. К. Гардзіцкі. – Мінск : Мастацкая літаратура, 1994. – С. 386.

2. Міронаў Аляксандр Яўгенавіч // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.] ; маст. рэд. В. Г. Загародні. – Мінск : БелЭн імя П. Броўкі, 1992. – Т. 1 : Абуховіч–Ватацы. – С. 310.

3. Міронаў Аляксандр Яўгенавіч // Памяць: Орша. Аршанскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў (гал. рэд.) [і інш.] ; склад. Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 2000. – Кн. 2. – С. 436.

4. Міронаў Аляксандр Яўгенавіч // Энцыклапедыя літаратуры і мастацтва Беларусі : у 5 т. / рэдкал.: І. П. Шамякін (гал. рэд.) [і інш.]. – Мінск : БелЭн, 1984. – Т. 1 : Акапэл–Габелен. – С. 637.

5. Шляхі да мора // Вёрсты пройдзеных дарог / І. А. Яршоў, В. М. Сіднякова. – Магілёў : Магілёўская друкарня, 2003. – С. 74–81.

6. Яршоў, І. Вялікая Айчынная вайна ў творах літаратараў Оршы і Аршаншчыны / І. Яршоў // Телеком-экспресс (Орша). – 2009. – 25 июня. – С. 7.