Мяснікоў Анатоль Фёдаравіч – беларускі гісторык, літаратар і публіцыст.

Нарадзіўся 15 ліпеня 1950 года ў в. Шмідзельшчына Талачынскага раёна ў сялянскай сям'і.

Скончыў Беларускі дзяржаўны ўніверсітэт (1972). Працаваў у газетах «Чырвоная змена», «Звязда» (з 1978 года). Кандыдат гістарычных навук (1987).

У 1994 годзе ўзнагароджаны Дзяржаўнай прэміяй Беларусі за кнігу «Нацдэмы: лёс і трагедыя Фабіяна Шантыра, Усевалада Ігнатоўскага і Язэпа Лёсіка» (1993).

З 1995 года – прэс-сакратар Старшыні Вярхоўнага Савета Рэспублікі Беларусь. У 1996–1999 гг. працаваў галоўным рэдактарам часопіса «Гуманітарна-эканамічны веснік».

З 1976 года – член Саюза журналістаў рэспублікі, з 2001 г. – член Саюза беларускіх пісьменнікаў.

З 2007 года – загадчык кафедры Інстытута парламентарызму і прадпрымальніцтва.

Даследаваў гісторыю Беларусі XIX–XX стст., праблемы беларускай журналістыкі і міжнацыянальных адносін у Рэспубліцы Беларусь.

Аўтар кніг: «Сацыялістычнае спаборніцтва і друк Беларусі» (1980), «Айчыне адданыя сыны: гістарычныя нарысы» (1997), «Дзеля гэтага варта жыць: публіцыстыка, дыялогі, эсэ» (2000), «Гісторыя Беларусі: ад старажытнасці да нашых дзён» (2004), «Вялікая Айчынная вайна савецкага народа (у кантэксце Другой сусветнай вайны)» (2005), «Талент быць чалавекам» (2005, сумесна з Г. І. Авсянкінай), «Сто асоб беларускай гісторыі» (2-е выд., 2009), «Сто асоб беларускага спорту» (2009; у 2010 годзе атрымаў Рэспубліканскую прэмію «Залаты купідон»), дакументальных аповесцей і нарысаў пра Я. А. Адамовіча, А. Л. Бурбіса, Д. Ф. Прышчэпава, А. А. Смоліча, І. П. Убарэвіча, М. С. Чарота, А. Г. Чарвякова і інш.

Памёр 21 красавіка 2011 года.

ЛІТАРАТУРА

1. Давідовіч, В. В. Мяснікоў Анатоль Фёдаравіч / В. В. Давідовіч // Культура Беларусі : энцыклапедыя : [у 6 т.] / рэдкал.: У. У. Андрыевіч [і інш.]. – Мінск : БелЭн імя П. Броўкі, 2015. – Т. 6 : М–Я. – С. 22.

2. Карніловіч, Э. Пароднены з газетай «Звязда» / Э. Карніловіч // Наша Талачыншчына. – 2013. – 18 верас. – С. 7.

3. Марціновіч, А. Каб менела ў гісторыі загадак / А. Марціновіч // Літаратура і мастацтва. – 2011. – 27 мая. – С. 22.

4. Мясников Анатолий Фёдорович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 153.

5. Мясников Анатолий Фёдорович // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн імя П. Броўкі, 2007. – Т. 5 : Минск–Педиатрия. – С. 282.

6. Мяснікоў Анатоль Фёдаравіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2004. – Т. 18. Кн. І : Дадатак : Шчытнікі–Яя. – С. 431.

7. Публицист, краевед, исследователь // Моя Толочинщина: страницы истории / А. Шнейдер. – 2-е изд, с изм. – Минск : Бизнесофсет, 2006. – С. 136–137.

8. Шнэйдар, А. Заўсёды ў пошуку / А. Шнэйдар // Наша Талачыншчына. – 2004. – 11 жн. – С. 2.