Рэлес Рыгор Львовіч нарадзіўся 23 красавіка 1913 года ў г. Чашнікі ў сям'і служачага.

Скончыў Віцебскі педагагічны тэхнікум (1933), вучыўся на яўрэйскім аддзяленні літаратурнага факультэта Мінскага педагагічнага інстытута імя М. Горкага.

У 1937–1941 гг. працаваў выкладчыкам рускай мовы і літаратуры ў сярэдніх школах Слуцка і Навагрудка.

З чэрвеня 1941 года – у Савецкай Арміі, а з 1942 года – адказны сакратар шматтыражнай газеты «Строитель».

У 1945–1947 гг. быў літработнікам у рэдакцыі піянерскай газеты «Зорька», а ў 1947–1973 гг. выкладаў рускую мову і літаратуру ў вячэрніх школах рабочай моладзі ў Мінску.

Упершыню выступіў у друку ў 1931 годзе. Пісаў на яўрэйскай і рускай мовах. Выдаў зборнікі вершаў на яўрэйскай мове «Пачатак» (1940), «Вершы» (1941).

Першая аповесць «Пра тое, чаго не ведаюць вучні» надрукавана ў 1955 годзе ў часопісе «Полымя» ў перакладзе на беларускую мову.

Аўтар аповесці «Записки моего коллеги» (1960), «Через трудный порог», (1976), зборнікаў прозы «Друзья и знакомые» (1963), «За тесными партами» (1966), «В родном уголке» (1972), «Под каждой крышей» (1979).

У 1961 годзе ў перакладзе на беларускую мову выйшла кніга вершаў «Бяроза пад акном». Пастаянна друкаваўся на старонках яўрэйскага часопіса «Саветыш Геймланд» («Савецкая Радзіма», Масква).

Літаратурны талент нашага земляка быў заўважаны і ацэнены па заслугах. У 1936 годзе ён стаў членам Саюза пісьменнікаў СССР.

У 1990-я гг. выкладаў мову ідыш у Мінскім аб'яднанні яўрэйскай культуры імя Ізі Харыка, уваходзіў у праўленне гэтай грамадскай суполкі. Быў узнагароджаны медалём.

Памёр Рыгор Львовіч 19 верасня 2004 года.

ЛІТАРАТУРА

1. Выдающиеся имена Отечества – уроженцы Чашникского района // Чашникский район : справочно-информационные материалы / отв. за вып. Т. В. Пчелкина. – Витебск : Витебская областная типография, 2008. – С. 9–10.

2. Дзеячы культуры і навукі – ураджэнцы Чашніччыны // Гістарычна-краязнаўчы курс «Наша Чашніччына». Чашніказнаўства / В. В. Грыбко. – Мінск : Медисонт, 2007. – С. 138–149.

3. Іванова, Г. «Цяпер так...» / Г. Іванова // Народнае слова. – 2013. – 7 мая. – С. 7.

4. Іофе, Э. Рыгор Рэлес: вядомы і невядомы / Э. Іофе // Полымя. – 2013. – № 4. – С. 145–158.

5. Лободенко, Г. «Для мяне іграў Галубок...» / Г. Лободенко // Белорусская деловая газета. – 2003. – 23 апр. – С.13.

6. Міхно, У. Там, дзе раслі бярозы светлыя... / У. Міхно // Чырвоны прамень (Чашнiкi). – 2007. – 8 студз. – С. 2.

7. Над рекой Ульянкой / подгот. И. Торбина // Чырвоны прамень (Чашнікі). – 2013. – 12 сак. – С. 4.

8. Судьбы связующие нити / подгот. И. Торбина // Чырвоны прамень (Чашнікі). – 2013. – 30 крас. – С. 4.