САДКОВІЧ МІКОЛА (МІКАЛАЙ) ФЁДАРАВІЧ нарадзіўся 21 студзеня 1907 года ў в. Вусце Аршанскага раёна ў сялянскай сям'і, кінадраматург, кінарэжысёр, беларускі пісьменнік. Заслужаны дзеяч мастацтваў БССР

У 1928 годзе скончыў Дзяржаўны тэхнікум кінематаграфіі ў Маскве. Да 1945 г. працаваў рэжысёрам на кінастудыях Масквы, Адэсы, Кіева, Ташкента. У 1942–1945 гг. – кіраўнік Беларускай кінагрупы на Цэнтральнай студыі дакументальных фільмаў у Маскве, з якой выязджаў да партызан і на франты.

У 1946–1947 гг.і з 1950 года – міністр кінематаграфіі БССР. У 1953–1956 гг. – намеснік міністра культуры БССР. Узначальваў рускую секцыю СП Беларусі. У 1948–1950 гг. быў галоўным рэдактарам і рэжысёрам Цэнтральнай студыі дакументальных фільмаў у Маскве.

З 1947 па 1959 гг. – дэпутат Вярхоўнага Савета БССР, з 1947 года – член СП СССР.

Мікалай Фёдаравіч Садковіч вядомы як празаік. У беларускім друку выступіў у 1948 годзе. Пісаў на рускай мове. Аўтар гістарычнага рамана «Георгий Скорина» (сумесна з Я. Львовым, 1951 г., папраўленае і дапоўненае ў 1957 г.), «Повести о ясном Стахоре» (1956), дзённіка назіранняў «Человек в тумане» (1960), рамана «Мадам Любовь» (1966). Яго творам уласцівы дынамізм сюжэта, арыгінальнасць кампазіцыі і каларытнасць персанажаў.

Лаўрэат дзяржаўнай прэміі СССР за дакументальны фільм «Дэмакратычная Германія».

Памёр Мікалай Фёдаравіч Садковіч 16 жніўня 1968 года.

ЛІТАРАТУРА:

1. Інтэлігент з тварам селяніна // Вёрсты пройдзенных дарог / І. А. Яршоў, В. М. Сіднякова. – Магілёў : Магілёўская друкарня, 2003. – С. 58–66.

2. Мікола Садковіч // Беларускія пісьменнікі (1917–1990) : даведнік / склад. А. К. Гардзіцкі. – Мінск : Мастацкая літаратура, 1994. – С. 477.

3. Пашковіч, В. Пісьменнік і кінарэжысёр / В. Пашковіч // Телеком-экспресс (Орша). – 2012. – 16 февр. – С. 21.

4. Садковіч Мікалай Фёдаравіч // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.] ; маст. рэд. В. Г. Загародні. – Мінск : БелЭн, 1995. – Т. 5 : Пестрак–Сяўрук. – С. 218.

5. Садковіч Мікалай Фёдаравіч // Памяць: Орша. Аршанскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад.: Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 2000. – Кн. 2. – С. 439.

6. Садковіч Мікалай Фёдаравіч // Энцыклапедыя літаратуры і мастацтва Беларусі : у 5 т. / рэдкал.: І. П. Шамякін [і інш.]. – Мінск : БелСЭ імя П. Броўкі, 1987. – Т. 4 : Накцюрн–Скальскі. – С. 605.

7. Яршоў, І. Інтэлігент з творам селяніна, Мікалай Федаравіч Садковіч / І. Яршоў // Аршанская газета. – 2002. – 28 мая. – С. 3.