Скарынкін Уладзімір Максімавіч
Скарынкін Уладзімір Максімавіч нарадзіўся 17 чэрвеня 1939 года ў Віцебску ў сям'і служачага. Беларускі паэт, перакладчык.
У гады Вялікай Айчыннай вайны разам з маці быў вывезены ў працоўныя лагеры: спачатку ў Лібаву (зараз г. Ліепая, Латвія), а потым – у Бромберг (зараз г. Быдгашч, Польшча). У 1946–1956 гг. вучыўся ў сярэдняй школе № 2 г. Гарадка. У 1961 годзе скончыў Рыжскі інстытут інжынераў грамадзянскай авіяцыі. Працаваў па спецыяльнасці ў Мінскім аэрапорце, Беларускім упраўленні грамадзянскай авіяцыі.
1982–1987 гг. – намеснік дырэктара Бюро прапаганды мастацкай літаратуры Саюза пісьменнікаў Беларусі. З сакавіка 1987 года – на творчай рабоце. З 1971 года – член Саюза пісьменнікаў Беларусі.
У друку Уладзімір Максімавіч упершыню выступіў у 1955 годзе ў газеце «Піянер Беларусі» з вершам «Першы яблык».
Уладзімір Максімавіч Скарынкін – аўтар зборнікаў лірыкі: «Буслы над аэрадромам» (1969), «Гукавы бар'ер», «Дазвольце ўзлёт» (1975), «Чацвёрты разварот» (1979), «Вугал атакі» (1983), «Пасадачныя агні» (1985), «Выратавальны плыт» (1988), «Размова на парозе» (1991), «Лосвіда» (1993), «Апошняе слова» (1994) ; аўтар паэм «Насустрач веку», «Сляпы дождж», «Высокае сонца», «Узнясенне», «Астральны знак Францыска»; аўтар перакладаў кнігі вершаў Мікалая Рубцова «Рускі агеньчык» (1986), паэмы Дантэ «Боская камедыя» (1998), Джорджа Байрана «Дон Жуан» і «Прароцтва Дантэ» (2004) і інш. Напісаў тры кніжкі для дзяцей: «Канікулярная ангіна» (1991), «Падарожжа ў Крайшарад» (1993), «У карэце па белым свеце» (2000). Творы У. Скарынкіна неаднаразова перакладаліся на рускую і ўкраінскую мовы. Некаторыя з яго вершаў пакладзены на музыку.
У яго творах адчуваецца асаблівая павага да гісторыі свайго народа, да бацькоўскай зямлі, Віцебшчыны і яе працавітых людзей. Часта паэт пераносіцца ў апаленае вайной дзяцінства, у цяжкія дні, што прайшлі ў фашысцкай няволі. Патрыятычныя пачуцці, гераізм беларускага народа ў гады ваеннага ліхалецця, любоў да працы і роднага краю – усё гэта падаецца натуральна, нязмушана.
Уладзімір Максімавіч Скарынкін – лаўрэат Нацыянальнай прэміі Італіі за пераклады, лаўрэат Дзяржаўнай прэміі Рэспублікі Беларусь імя Я. Купалы. Узнагароджаны памятным медалём «Паэт і воін Ігар Мікалаевіч Грыгор'еў (1923–1996)». Ганаровы грамадзянін Гарадоцкага раёна (2017).
Жыве ў Мінску.
ЛІТАРАТУРА
1. Берёза, А. Заслужили признательность городокчан / А. Берёза // Гарадоцкі веснік. – 2017. – 12 жн. – С. 4.
2. Гарэлік, Л. М. Скарынкін Уладзімір / Л. М. Гарэлік, В. У. Смольская // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.] ; маст. рэд. В. Г. Загародні. – Мінск : БелЭн, 1995. – Т. 5 : Пестрак–Сяўрук. – С. 358–361.
3. Гумарыстычныя далягляды. Віцебшчына // Вожык. – 2011. – № 1. – С. 12–21.
4. Іванова, В. Ганарацца земляком / В. Іванова // Літаратура і мастацтва. – 2014. – 27 чэрв. – С. 3.
5. Камейша, К. В. Свая вышыня / К. В. Камейша // Пачатковая школа. – 2014. – № 5. – С. 29–30.
6. Канапелька, А. Уладзімір Скарынкін / А. Канапелька // Народнае слова. – 2000. – 16 мая. – С. 3.
7. Са святам, Уладзімір Максімавіч! / падрыхт. Г. Навумава // Гарадоцкі веснік. – 2014. – 14 чэрв. – С. 4.
8. Саламаха, У. Журба і радасць Уладзіміра Скарынкіна / У. Саламаха // Літаратура і мастацтва. – 2003. – 31 студз. – С. 12.
9. Свірко, І. «З былых стагоддзяў да мяне дайшло Пятраркі, Дантэ, Байрана святло» / І. Свірко // Рэспубліка. – 2011. – 14 мая. – С. 16.
10. Скарынкін Уладзімір Максімавіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2000. – Т. 14 : Рэле–Слаявіна. – С. 449.
11. Скарынкін Уладзімір Максімавіч // Памяць: Віцебск : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад. А. І. Мацяюн ; мастак Э. Э. Жакевіч. – Мінск : БелЭн, 2003. – Кн. 2. – С. 537.
12. Скарынкін Уладзімір Максімавіч // Пісьменнікі – нашы землякі : (біяграфічныя звесткі) / Віцебская абласная бібліятэка, Аддзел бібліятэказнаўства і навуковых даследаванняў ; [склад. А. М. Лемеш]. – Віцебск, 1996. – С. 17–18.
13. Скоринкин Владимир Максимович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 469.
14. Скоринкин, В. М. «Пусть творения мировых гениев звучат и на белорусском» / В. М. Скоринкин ; беседовала Е. Пучкова // Гарадоцкі веснік. – 2009. – 13 студз. – С. 2.
15. Уладзімір Скарынкін // Беларускія пісьменнікі (1917–1990) : даведнік / склад. А. К. Гардзіцкі. – Мінск : Мастацкая літаратура, 1994. – С. 500.
16. Явіч, Я. Майстар перастварэнняў / Я. Явіч // Літаратура і мастацтва. – 2014. – 20 чэрв. – С. 9.
СПАСЫЛКІ
Поэтический маршрут. Владимир Максимович Скоринкин
«Я беларускаму малюся слову...», или о чем мечтает поэт Владимир Скоринкин
