Сушко Павел Міхайлавіч нарадзіўся 7 лістапада 1909 года ў в. Сушкі Дзісенскага павета Віленскай губерні (зараз Мёрскі раён). Паэт.

Адзін з арганізатараў першага ў Мёрскім раёне калгаса «Баявы партызан», старшыня Чараскага сельсавета. У гады Вялікай Айчыннай вайны – сувязны партызанскага атрада «Масква», потым – партызан 4-й Беларускай партызанскай брыгады. Пасля вайны ўдзельнічаў у аднаўленні разбуранай гаспадаркі.

Друкавацца П. Сушко пачаў у 1938 годзе ў прагрэсіўных газетах і часопісах Заходняй Беларусі. У газеце «Кліч партызан» (орган Міёрскага падпольнага райкама) у 1943 годзе выступаў з нататкамі пад псеўданімам Язэп Сяўня. Пісаў вершы пра заходнебеларускае падполле, гераізм партызан, услаўляў радасць мірнай працы, апяваў хараство родных краявідаў. Яго паэзія шчырая, непасрэдная, прасякнутая дабрынёй, еднасцю з людзьмі працы. Да ўз'яднання Заходняй Беларусі з БССР творы П. Сушко распаўсюджваліся сярод падпольшчыкаў і працоўных, заклікалі іх на барацьбу з нацыянальнымі прыгнятальнікамі.

У пасляваенны час выступаў з вершамі і допісамі ў раённай газеце, абласным і рэспубліканскім друку. Вершы П. Сушко «Сцяжынка» і «Ой, ішла дзяўчына» пакладзены на музыку М. Пятрэнкам і А. Палонскім. У Вільнюсе ў акадэмічнай бібліятэцы захоўваецца рукапісны зборнік яго вершаў «Адгалоскі» (1939).

Памёр Павел Міхайлавіч 26 верасня 1974 года.

ЛІТАРАТУРА

1. Ліякумовіч, Ц. Б. Сушко Павел / Ц. Б. Ліякумовіч, Т. М. Махнач // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.]. – Мінск : БелЭн імя П. Броўкі, 1995. – Т. 5 : Пестрак–Сяўрук. – С. 453–454.

2. Мароз, Б. Паэт-партызан / Б. Мароз // Міёрскія навіны. – 2010. – 23 лют. – С. 2.

3. Собаль, В. Паэты з Сушкоў / В. Собаль // Віцебскі рабочы. – 1997. – 1 студз. – С. 2.

4. Сушко Павел // Беларускія пісьменнікі (1917–1990) : даведнік / склад. А. К. Гардзіцкі. – Мінск : Мастацкая літаратура, 1994. – С. 521.

5. Сушко Павел Міхайлавіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2002. – Т. 15 : Следавікі–Трыо. – С. 300.

6. Тамашэвіч, І. Яны нарадзіліся ў Сушках / І. Тамашэвіч // Міёрскія навіны. – 2010. – 30 лістап. – С. 3.

7. Творцы першай хвалі // Міёрскія навіны. – 2017. – 6 чэрв. – С. 6.

СПАСЫЛКІ

 Пісьменнікі, паэты, літаратары Мёрскі раён