Вуль Ялегі Пранціш (сапраўднае імя – Карафа-Корбут Элігій-Францішак Маўрыкіевіч) нарадзіўся 9 (21) красавіка 1835 года ў Віцебску ў сям'і чыноўніка. Паэт, празаік.

Вучыўся ў Віцебскай гімназіі. У 1856–1862 гг. працаваў пісарам у губернскай палаце дзяржаўнай маёмасці, адначасова ўваходзіў у гурткі перадавой моладзі Віцебска.

Літаратурнымі здольнасцямі вылучаўся яшчэ падчас вучобы ў гімназіі, дзе прымаў актыўны ўдзел у «літаратурных гутарках», для якіх напісаў сачыненні – «Успамін дзяцінства і юнацтва» (1851), «Віцебск» (1852), «Хрэсьбіны ў беларускіх сялян» (1853) і інш. Яго сачыненні як узорныя неаднойчы адпраўляліся ва ўпраўленне навучальнай акругі (Пецярбург).

У 1859 годзе ўпісаў у «Альбом» Вярыгі-Дарэўскага свой адзіны вядомы на беларускай мове верш «К дудару Арцёму ад наддзвінскага мужыка» – узор беларускай грамадзянскай лірыкі сярэдзіны XIX ст., які яскрава выявіў паэтычны талент і дэмакратычныя пазіцыі аўтара.

У 1863 годзе Я. Вуль і ўся яго сям'я прынялі актыўны ўдзел у паўстанні. Пасля чаго разам з братам ён быў сасланы ў Сібір на пасяленне, а яго бацька атрымаў 8 гадоў катаргі.

Вярнуўшыся з Сібіры, жыў у Варшаве, дзе разам з В. Каратынскім і А. Плугам стварыў беларускі гурток. Творы Я. Вуля пры жыцці не друкаваліся.

Памёр Ялегі Пранціш Вуль 8 снежня 1894 года ў Варшаве.

ЛІТАРАТУРА

1. Канапелька, А. Ялегi Пранцiш Вуль / А. Канапелька // Народнае слова. – 1998. – 29 верас. – С. 4.

2. Кісялёў, Г. В. Вуль Ялегі Пранціш / Г. В. Кісялёў // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1997. – Т. 4 : Варанецкі–Гальфстрым. – С. 293.

3. Кісялёў, Г. В. Вуль Ялегі Пранціш / Г. В. Кісялёў, З. У. Драздова // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.] ; маст. рэд. В. Г. Загародні. – Мінск : БелЭн, 1993. – Т. 2 : Верабей–Іваноў. – С. 52–53.