Якутаў Уладзімір Дзмітрыевіч нарадзіўся 5 лістапада 1926 года ў в. Рацькава Ушацкага раёна. Публіцыст, празаік. Вучыўся ў Рацькаўскай школе. У гады Вялікай Айчыннай вайны быў у партызанскім атрадзе брыгады «Няўлоўныя». Пасля вызвалення раёна, з 1944 года – у дзеючай арміі. Дэмабілізаваны па раненні ў 1945 годзе. Працаваў сакратаром Булаўскага сельсавета Полацкага раёна (1945–1946). У 1946 годзе накіраваны ў Літву, дзе працаваў сакратаром валаснога камітэта камсамола, інструктарам райкама партыі (1946–1961). Скончыў гістарычны факультэт Вільнюскага ўніверсітэта (1954). Пераехаўшы ў Мінск, працаваў адказным сакратаром рэспубліканскага таварыства «Веды», намеснікам дырэктара па культрабоце тэхнічнага вучылішча № 53 (1961–1963), старшым навуковым супрацоўнікам Інстытута гісторыі партыі пры ЦК КПБ (1963–1973), старшым навуковым супрацоўнікам Інстытута гісторыі АН БССР (1973–1990). У 1990 годзе выйшаў на пенсію. Узначальваў культурна-творчую фірму «Русь Белая». Узнагароджаны ордэнамі Айчыннай вайны I ступені, Чырвонай Зоркі, медалямі.

Пачаў друкавацца з 1962 года. Апублікаваў шэраг навуковых прац па гісторыі Кампартыі Беларусі. Піша апавяданні, аповесці, біяграфічныя нарысы пра беларускіх партыйных і дзяржаўных дзеячаў (Д. Валковіча, М. Галадзеда, 3. Жылуновіча, П. Машэрава, С. Прытыцкага, А. Чарвякова і інш.), пра Кастрычніцкую рэвалюцыю і грамадзянскую вайну («Агонія», «Віхурны досвітак»). Творы У. Якутава заснаваны на дакументах, фактычным матэрыяле. Аўтар аповесці «Янаўская элегія» (1993). Член Саюза пісьменнікаў Беларусі з 1984 года.

Працаваў ў жанры біяграфіі, эсэ, нарысаў.

Памёр Уладзімір Дзмітрыевіч Якутаў у 2010 годзе.

ЛІТАРАТУРА

1. Якутаў Уладзімір // Беларускія пісьменнікі : біябібліяграфічны слоўнік : у 6 т. / пад рэд. А. В. Мальдзіса. – Мінск : БелСЭ, 1995. – Т. 6 : Талалай–Яфімаў. – С. 486.

2. Якутаў Уладзімір Дзмітрыевіч // Памяць: Ушацкі раён : гісторыка-дакументальныя хронікі гарадоў і раёнаў Беларусі / рэдкал.: Г. К. Кісялёў [і інш.] ; уклад. М. М. Кірпіч ; мастак Э. Э. Жакевіч. – Мінск : Белта, 2003. – С 553–554.