Янсанэ (Панізнік) Ніна Сцяпанаўна нарадзілася 21 лістапада 1933 года ў в. Бабышкі Браслаўскага павета Віленскай губерні (зараз Мёрскі раён). Перакладчыца.

Пасля заканчэння Лявонпальскай сямігодкі, у 1951 годзе паступіла ў тэхнікум малочна-мясной прамысловасці ў Рызе. Да пенсіі працавала на адным з рыжскіх заводаў. З 1998 года – грамадзянка Латвійскай Рэспублікі.

За гады жыцця ў Латвіі Ніна Янсанэ ўвабрала ў сябе дух латышскай культуры, дасканала авалодала глыбіннымі пластамі мовы. У 1993 годзе ў мінскім выдавецтве «Юнацтва» выйшаў том «Выбранае» Яна Райніса, для якога яна зрабіла падрадкоўнікі вершаў і пераклала некалькі артыкулаў класіка латышскай літаратуры (для серыі «Скарбы сусветнай літаратуры»).

Пераклады вершаў латышскіх паэтаў паводле падрадкоўнікаў Ніны Янсанэ змешчаны ў зборніку «Сустрэча роднасных сусветаў» (1997). Яе пераклады друкаваліся ў штогодніку «Ветразь», часопісе «Вожык», у газетах «Наша слова», «Набат». У 2013 годзе ў «Краязнаўчай газеце» быў змешчаны артыкул «Помню свой мацярык».

Перакладала латышскія народныя казкі, прозу Соўлцэрытэ Віесэ і Аі Лацэ, успаміны Яніса Ніедрэ, навуковае даследаванне Петэрыса Зэйдэ пра латышска-беларускія ўзаемадачыненні, нарыс Матыльды Езавітавай «Кароткі агляд старажытнай беларускай культуры і літаратуры», брашуру 1938 года Вілбертса Краснайса «Беларусы як адгалінаванне народа латышскага», якая ўяўляе цікаваць і цяпер.

Жыве ў Юрмале.

ЛІТАРАТУРА

1. Панізьнік, С. І сонца па зямлі хадзіла! / С. Панізьнік // Краязнаўчая газета. – 2018. – № 44 (лістап.). – С. 5.

2. Панізьнік, С. Не зарасці пракладзенаму следу: Ніна Янсанэ / С. Панізьнік // Міёрскія навіны. – 2017. – 19 снеж. – С. 7.

3. Панізьнік, С. Пасляслоўе да згадак / С. Панізьнік // Краязнаўчая газета. – 2013. – № 42 (лістап.). – С. 6.

4. Янсанэ, Н. Помню свой мацярык: там сонца па зямлі хадзіла...: (з маіх бабышкаўскіх успамінаў) / Н. Янсанэ // Краязнаўчая газета. – 2013. – № 42 (лістап.). – С. 6.

5. Янсанэ (Панізьнік) Ніна // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 322–323.

6. Янсанэ (Панізьнік) Ніна // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 189–190.

СПАСЫЛКІ

 Выдатныя людзі ў розных галінах дзенасці. Мёрскі раён