Зязюля Андрэй (Астрамовіч Аляксандр Сцяпанавіч) нарадзіўся 26 лістапада 1878 года ў в. Навасады Ашмянскага раёна Гродненскай вобласці (Віленская губерня, Ашмянскі павет, в. Навасады). Беларускі паэт, каталіцкі святар.

Пачатковую адукацыю атрымаў у Гальшанах, пасля чаго скончыў Ашмянскую павятовую школу. Пасля працаваў на гаспадарцы бацькоў. Служыў у расійскім войску, закончыў службу ў званні малодшага афіцэра. У 1905–1910 гг. вучыўся ў каталіцкай духоўнай семінарыі ў Пецярбургу, дзе стварыў беларускую секцыю і звярнуўся да паэтычнай творчасці.

Служыў ксяндзом у мястэчках Трабы, Ракаў, Свержань, Анопаль, Смілавічы. Службу вёў па-беларуску. З верасня 1917 года Астрамовіч – пробашч касцёла ў Абольцах Аршанскага дэканата, а з 1919 па 1921 гг. Аляксандр Сцяпанавіч – апошні ксёндз касцёла Святой Троіцы ў Сянно.

З'яўляўся адным з арганізатараў і ўдзельнікам з'езда беларускага каталіцкага духавенства ў Мінску (24–25 мая 1917).

У літаратурнай творчасці Андрэй Астрамовіч вядомы пад псеўданімам Андрэй Зязюля. Першыя вершы друкаваў у 1909–1912 гг. у газеце «Наша ніва». Быў знаёмы з Янкам Купалам і Якубам Коласам. Таксама друкаваўся ў першай беларускай каталіцкай газеце «Беларус» і іншых беларускіх перыядычных выданнях. Выдаў зборнік паэзіі «З роднага загону», факсімільнае выданне якога захоўваецца ў фондах Сенненскага гісторыка-краязнаўчага музея.

Аўтар беларускага рэлігійнага гімна, збіраў народныя песні, якія ўвайшлі ў зборнік «Беларускія песні з нотамі».

Памёр 17 студзеня 1921 года.

ЛІТАРАТУРА

1. Жалтабрухава, Б. Крыж і церні жыцця / Б. Жалтабрухава // Голас Сенненшчыны. – 2023. – 5 снеж. – С. 5.

2. Зязюля Андрэй // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1998. – Т. 7 : Застаўка–Кантата. – С. 125.

3. Зязюля Андрэй (Астрамовіч Аляксандр Сцяпанавіч) // Звязаны лёсам з Сенненшчынай : біяграфічны даведнік / склад. А. В. Бараноўскі. – Віцебск : ВДУ імя Машэрава, 2017. – С. 24–25.

4. Ксёндз-пясняр // Экскурсія да вытокаў горада Сянно : краязнаўчыя нарысы / В. В. Бандарэвіч. – Мінск : Литература и Искусство, 2008. – С. 65–66.