Генаў Мікалай Леанідавіч нарадзіўся 3 студзеня 1930 года ў г. Полацк.

У час Вялікай Айчыннай вайны ў эвакуацыі ў Бугульмінскім раёне Татарскай АССР працаваў у калгасе. У 1944 г. вярнуўся ў Полацк, паступіў вучнем у радыёмайстэрню. У 1951 г. прызваны ў рады Савецкай Арміі, служыў на Паўночным ваенным флоце. З 1959 г. працаваў у УМ-141 г. Наваполацка на пасадзе кранаўшчыка на будаўніцтве аб'ектаў Полацка і Наваполацка.

Адзін з арганізатараў фізкультурнага руху ў Наваполацку. Заснаваў вядомую ва ўсім свеце водналыжную школу імя Ю. А. Гагарына (19 мая 1968 г. прыняты статут клуба Наваполацкіх водналыжнікаў). Першы з наваполацкіх трэнераў атрымаў званне «Заслужаны трэнер БССР» (1980).

За вялікі ўклад у будаўніцтва Наваполацка ўзнагароджаны ордэнам «Знак Пашаны» (1967). Мае Ганаровы знак «За развіццё фізічнай культуры і спорту ў Рэспубліцы Беларусь» (2000).

22 лютага 2002 г. Мікалай Леанідавіч загінуў у аўтамабільнай катастрофе. Пасмяротна ўзнагароджаны медалём «За заслугі» (2003).

У 2003 г. Міністэрства спорту і турызму Рэспублікі Беларусь прысвоіла СДЮШАР па водналыжным спорце г. Наваполацка імя М. Л. Генава. Пачынаючы з 2003 г. у Наваполацку праходзіць міжнародны турнір памяці М. Л. Генава з удзелам спартсменаў з розных краін свету. У гэтым жа годзе яму прысвоена званне «Ганаровы грамадзянін горада Наваполацка».

У памяць аб М. Л. Генаве ў 2004 годзе адкрыта мемарыяльная дошка.

ЛІТАРАТУРА

1. Быньков, А. Парящие над водой / А. Быньков // Витебские вести. – 2015. – 10 сент. – С. 15.

2. В память о Николае Генове // Информ Плюс (Полоцк). – 2011. – 29 сент. – С. 5.

3. Генов Николай Леонидович // Почетные граждане города Новополоцка / [сост. С. Б. Филиппенкова ; ред. совет: Н. М. Марченко, В. К. Мартыненко, М. В. Караваева]. – Новополоцк : ПГУ, 2015. – С. 6.

4. Малашеня, Л. С именем Николая Генова / Л. Малашеня // Витебские вести. – 2015. – 14 февр. – С. 11.

5. Только вперёд! // Новополоцк сегодня. – 2016. – 10 июня. – С. 7.

6. Факеев, В. Он море прописал на суше / В. Факеев // Новая газета (Наваполацк). – 2013. – 15 февр. – С. 2.

7. Факеев, В. Союз всемирный нас отметил / В. Факеев // Новая газета (Наваполацк). – 2013. – 22 февр. – С. 3.

8. Факеев, В. Яркий след на земле и воде / В. Факеев // Новополоцк сегодня. – 2016. – 21 июня. – С. 4.