Пуціла Антон Канстанцінавіч нарадзіўся 23 чэрвеня 1987 г. у Оршы, беларускі футбаліст, паўабаронца.

Выхаванец аршанскай ДЮСШ (першы трэнер – Канстанцін Пуціла, бацька).

Прафесійную кар'еру пачаў у мінскім «Дынама» ў 2004 годзе: выступаў за дубль і дэбютаваў у чэмпіянаце Беларусі. У 2005 годзе па ходу сезона ўвайшоў у асноўны склад каманды.

У лістападзе – снежні 2007 года Пуціла тры тыдні знаходзіўся на праглядзе ў «Гамбургу», трэніраваўся і ўдзельнічаў у спарынгах з аматарскай і другой камандай клуба, а з асновай правёў некалькі трэніровак. У выніку было вырашана, што Антон будзе выступаць за нямецкі клуб на правах арэнды да канца 2008 года з правам выкупу.

Дэбют за «Гамбург» адбыўся 10 студзеня 2008 года ў дамашнім матчы супраць «Бохума», дзе Антон выйшаў на замену на 81-й хвіліне. За год у складзе каманды Германіі ён выходзіў на поле ўсяго 3 разы. У лістападзе ён пабываў на праглядзе ў маскоўскім «Лакаматыве», але да канкрэтных прапаноў справа не дайшла. У міжсезонне Антон вярнуўся назад у «Дынама», якому належыў па кантракце яшчэ на працягу 2-х гадоў.

У жніўні 2010 года Пуціла перайшоў у «Фрайбург». У дэбютным сезоне 2010/11 ён правёў 25 матчаў і вызначыўся дзвюма галявымі перадачамі. У сезоне 2011/12 згуляў у 19 матчах каманды і зрабіў адну дзейсную перадачу. У пачатку сезона 2012/13 адмовіўся працягваць кантракт з клубам, у выніку амаль не гуляў да 17 лютага 2013 года.

19 лютага 2013 падпісаў кантракт з ніжагародскай «Волгай» (да канца чэрвеня, на ўмовах далейшага прадаўжэння). 24 жніўня забіў пераможны гол у вароты «Церака», адзін з лепшых на чэмпіянаце Расіі за 2013/14. Пасля вылету «Волгі» у ФНЛ скарыстаўся пунктам, які дазваляў скасаваць кантракт датэрмінова, у выпадку паніжэння клуба ў турнірнай табліцы.

1 верасня 2014 года на правах вольнага агента перайшоў у маскоўскі клуб «Тарпеда», пагадненне было разлічана да 31 мая 2016 года.

Удзельнік чэмпіянату Еўропы сярод маладзёжных каманд 2009 года ў Швецыі. У нацыянальнай зборнай Беларусі дэбютаваў 4 лютага 2008 года на XVI Міжнародным турніры нацыянальных зборных на Мальце ў матчы са зборнай Арменіі (1:2). Першы мяч забіў у вароты зборнай Арменіі ў таварыскім матчы 3 сакавіка 2010 года ў Анталіі (3 : 1). 27 мая 2010 года ў таварыскім матчы з Гандурасам (2 : 2) двойчы паразіў вароты саперніка. 7 чэрвеня 2011 года забіў гол у вароты Люксембурга (2 : 0) у Мінску ў матчы адборачнага турніру чэмпіянату Еўропы – 2012; 11 верасня 2012 года забіў гол у вароты зборнай Францыі (1 : 3) у Сен-Дэні ў матчы адборачнага турніру чэмпіянату свету – 2014.

ЛІТАРАТУРА

1. Ивулин, А. Футбол в Орше. Мечты или суровая реальность? / А. Ивулин // Телеком-экспресс (Орша). – 2009. – 25 июня. – С. 30.

2. Шутова, О. Как воспитать звезду футбола / О. Шутова // Народнае слова. – 2008. – 7 лют. – С. 8.