Архіпец Мікалай Цімафеевіч нарадзіўся 14 верасня 1922 года ў в. Каменны Барок Мінскай вобласці.

У 1936–1940 гг. вучыўся ў Мінскім архітэктурна-будаўнічым тэхнікуме. Пасля яго заканчэння працаваў тэхнікам-канструктарам ўмацаванага раёна (УНС-71) у Гродна.

У перыяд Вялікай Айчыннай вайны прымаў удзел у баях супраць нямецка-фашысцкіх захопнікаў. Пасля дэмабілізацыі працаваў начальнікам будаўнічага ўчастка ў г. п. Беразіно Мінскай вобласці.

З 1946 г. працаваў прарабам БУ № 2 «Главпромстроя» (г. Мінск). У 1952 г. пераведзены ў горад Барысаў Мінскай вобласці на пасаду начальніка будаўнічага ўпраўлення. Затым працаваў кіраўніком трэста № 23 Міністэрства гарадскога і сельскага будаўніцтва БССР, начальнікам УНР-28 трэста № 6.

З ліпеня 1958 г. прызначаны кіраўніком будаўнічага трэста № 23 у г. Орша Віцебскай вобласці. У 1967 г. скончыў навучанне ў Беларускім політэхнічным інстытуце. З верасня 1961 г. да чэрвеня 1968 г. – кіраўнік трэста № 16 «Нафтастрой». Унёс вялікі ўклад у будаўніцтва найбуйнейшага ў рэспубліцы нафтахімічнага комплексу і горада Наваполацка.

У маі 1968 г. прызначаны першым намеснікам міністра, з лістапада 1969 г. – міністрам прамысловага будаўніцтва БССР. Пад яго кіраўніцтвам і пры непасрэдным удзеле ў Міністэрстве была распрацавана і ўкаранёна аўтаматызаваная сістэма кіраўніцтва будаўніцтвам, уведзены ў дзеянне прадпрыемствы па вытворчасці мінеральных угнаенняў, лёгкай і харчовай галін прамысловасці. З 1979 г. па 1988 гг. – намеснік старшыні Дзяржаўнага камітэта СССР па матэрыяльна-тэхнічным забеспячэнні.

Прысвоена званне «Заслужаны будаўнік БССР». Узнагароджаны двума ордэнамі Леніна, ордэнамі Кастрычніцкай Рэвалюцыі, Працоўнага Чырвонага Сцяга, Айчыннай вайны I ступені, медалямі. У 1985 г. прысвоена званне «Ганаровы грамадзянін горада Наваполацка».

Памёр Мікалай Цімафеевіч Архіпец 29 ліпеня 1996 года.

У 1998 г. у Наваполацку адкрыта мемарыяльная дошка ў гонар М. Ц. Архіпца (аўтар – наваполацкі скульптар Леў Аганаў).

ЛІТАРАТУРА

1. Архипец Николай Тимофеевич // Почетные граждане белорусских городов : биографический справочник / Б. Д. Долготович. – Минск : Беларусь, 2008. – С. 85.

2. Архипец Николай Тимофеевич // Почетные граждане города Новополоцка / [сост. С. Б. Филиппенкова ; ред. совет: Н. М. Марченко, В. К. Мартыненко, М. В. Караваева]. – Новополоцк : ПГУ, 2015. – С. 6.