Арлова Галіна Аляксандраўна нарадзілася 30 лістапада 1928 года ў Віцебску. Актрыса тэатра і кіно.

У 1947 годзе скончыла студыю Беларускага тэатра імя Я. Коласа. У тэатры дэбютавала ў ролі Раберты («Закон Лікурга» паводле Т. Драйзера). Выканаўца характарных і драматычных роляў: Ядвіся («Навальніца будзе» паводле трылогіі Я. Коласа «На ростанях»), Маланка («Машэка» В. Вольскага), Ягадка («Амністыя» М. Матукоўскага), Нэлі («Зняважаныя і пакрыўджаныя» паводле Ф. Дастаеўскага), Антаніна Львоўна («І змоўклі птушкі» паводле І. Шамякіна) і іншыя. Найбольш значная роля Галіны Арловай у тэатры – Афелія ў спектаклі «Гамлет» У. Шэкспіра (1955). Работа ў Нацыянальным акадэмічным драматычным тэатры імя Я. Коласа – плённы перыяд у творчасці Арловай, дзе і вызначыліся асноўныя рысы яе творчасці: эмацыянальнасць, псіхалагічная глыбіня ў спасціжэнні характару, пластычная і моўная выразнасць, увага да партнёраў.

3 1959 года Галіна Аляксандраўна працуе ў Нацыянальным акадэмічным тэатры імя Я. Купалы. Дэбютавала ў ролі Кацюшы Маславай («Уваскрэсенне» паводле Л. Талстога). Большасць роляў Галіны Арловай на купалаўскай сцэне пазначаны пошукам дакладных сродкаў акцёрскай выразнасці для глыбокага і арыгінальнага ўвасаблення аўтарскай задумы. Сярод дасягненняў – Маша («Жывы труп» Л. Талстога), Алена («Жаніцьба Бялугіна» А. Астроўскага і М. Салаўёва), Васіліса («На дне» М. Горкага), Ганна Андрэеўна («Рэвізор» М. Гогаля), Карпухіна («Дзядзечкаў сон» паводле Ф. Дастаеўскага), Кукушкіна («Даходнае месца» А. Астроўскага), Ірына («Веру ў цябе» В. Карастылёва), Кудрыцкая («Брама неўміручасці» К. Крапівы), Кісялёва («Характары» паводле В. Шукшына), Эма Герберт («Бераг» паводле Ю. Бондарава). Яркае камедыйнае майстэрства, багаты арсенал акцёрскіх магчымасцяў выявіла Галіна Арлова ў ролі Грыпіны («Мікітаў лапаць» М. Чарота ў спектаклі «Ажаніцца – не журыцца»). Глыбока нацыянальны характар беларускай сялянкі Зуйчыхі яна паказала ў спектаклі «Страсці па Аўдзею» У. Бутрамеева.

Жонка народнага артыста СССР Мікалая Мікалаевіча Яроменкі, маці акцёра Мікалая Яроменкі.

Галіна Аляксандраўна Арлова ўдастоена звання «Народная артыстка Беларусі», Дзяржаўнай прэміі БССР за ролі ў радыёспектаклях «Хамуціус» паводле А. Куляшова і «Рыбакова хата» паводле Я. Коласа.

Узнагароджана ордэнам «Знак Пашаны».

Памерла 21 жніўня 2021 года. Пахавана на Усходніх могілках Мінска, побач з мужам - народным артыстам СССР Мікалаем Яроменка і сынам.

ЛІТАРАТУРА

1. Арлова Галіна Аляксандраўна // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1996. – Т. 1 : А–Аршын. – С. 483.

2. Арлова Галіна Аляксандраўна // Культура Беларусі : энцыклапедыя : у 6 т. / рэдкал.: Т. У. Бялова [і інш.]. – Мінск : БелЭн імя П. Броўкі, 2010. – Т. 1 : А–Б. – С. 207.

3. Бунта, Т. Галіна Арлова: «Я называла іх ласкава – мае Яромы...» / Т. Бунта // Звязда. – 2014. – 13 лістап. – С. 1, 4. – (Дадат.: Сямейная газета).

4. Кривошеева, Н. «Жизнь состоялась...» / Н. Кривошеева // Народная газета. – 2013. – 30 лістап. – С. 12.

5. Кривошеева, Н. «Милый лжец» на бис / Н. Кривошеева // Рэспублiка. – 2007. – 26 ліп. – С. 8.

6. Орлова, Г. А. Галина Орлова и ее мужчины / Г. А. Орлова ; беседовала В. Гнилозуб // Белорусская нива. – 2013. – 30 нояб. – С. 6.

7. Орлова, Г. А. Жизнь – состоявшийся роман... / Г. А. Орлова ; беседовала Н. Кривошеева // На экранах. – 2008. – № 10. – С. 2–4.

8. Орлова, Г. А. Искренность взамен адреналина / Г. А. Орлова ; беседовала Т. Комонова // Культура. – 2007. – 6–13 ліп. – С. 28.

9. Орлова, Г. А. Три я / Г. А. Орлова, Л. С. Екель. – Минск : Журфонд БCЖ, 1996. – 95 с. – (Творцы).

10. Орлова Галина Александровна // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 230.

11. Серебряная, Н. «Театр – главное в моей жизни» / Н. Серебряная // Рэспубліка. – 2013. – 29 лістап. – С. 12.

12. Смольскі, Р. Б. Арлова Галіна Аляксандраўна / Р. Б. Смольскі // Тэатральная Беларусь : энцыклапедыя : у 2 т. / рэдкал.: Г. П. Пашкоў [і інш.]. – Мінск : БелЭн, 2002. – Т. 1 : А–К. – С. 53–54.

13. У Галіны Арловай – юбілей! // Культура. – 2008. – 29 лістап. – 5 снеж. – С. 2.