Багдановіч Анатоль Васільевіч нарадзіўся 28 жніўня 1888 года ў мястэчку Слабада-Дзісна Дрысенскага павета Віцебскай губерніі (зараз Верхнядзвінскі раён), беларускі і рускі мовазнаўца, педагог.

Вучыўся ў Віцебскай духоўнай семінарыі, а ў 1913 годзе скончыў гісторыка-філалагічны факультэт Варшаўскага ўніверсітэта.

З 1925 года пачаў выступаць па пытаннях беларускага мовазнаўства. З лютага 1926 года – дацэнт кафедры беларускай мовы Беларускага дзяржаўнага ўніверсітэта. Паралельна ў Інстытуце беларускай культуры – сакратар Камісіі правапісу і Камісіі беларускай літаратурнай мовы.

У 1926 годзе выйшла брашура «Увагі да праекту па рэформе правапісу». У 1927 годзе – падручнік для тэхнікумаў па самаадукацыі «Беларуская мова». Прымаў дзейсны ўдзел у распрацоўцы праектаў беларускага правапісу 1930 і 1933 гг.

Падчас працы ў Краснадарскім краі ў сааўтарстве з іншымі педагогамі выдаў падручнік рускай мовы для адыгейскіх школ. Апошнія гады працаваў у Херсонскім педінстытуце.

Рукапісы некаторых прац канца 20-х – пачатку 30-х гг., прысвечаныя мове беларускага народа, не маглі ў той час трапіць у друк і захоўваюцца ў бібліятэцы Нацыянальнай Акадэміі навук Беларусі.

Памёр Анатоль Васілевіч 2 жніўня 1969 года.

ЛІТАРАТУРА

1. Багдановіч Анатоль Васілевіч // Беларуская Савецкая Энцыклапедыя : у 12 т. / рэдкал.: П. У. Броўка [і інш.]. – Мінск, 1970. – Т. 2 : Афіны–Ведрыч. – С. 59.

2. Багдановіч Анатоль Васільевіч // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 29.

3. Багдановіч Анатоль Васільевіч // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 18.

4. Богданович Анатолий Васильевич // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн, 2006. – Т. 2 : А–Герань. – С. 426.

5. Богданович Анатолий Васильевич // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 73–74.