Барышнікаў Анатоль Юр'евіч нарадзіўся 21 верасня 1944 года ў г. п. Ушачы. Заслужаны дзеяч навукі Расіі (1994). Акадэмік Медыка-тэхнічнай акадэміі Расіі (1997), акадэмік Біятэхнічнай акадэміі Расіі (1993), правадзейны член Нью-Йоркскай акадэміі навук (1995), доктар медыцынскіх навук (1985), прафесар (1991). Закончыў Віцебскі медыцынскі інстытут (1968), аспірантуру пры Маскоўскім інстытуце эксперыментальнай і клінічнай анкалогіі Акадэміі медыцынскіх навук СССР. У 1969–1971 гг. служыў у Савецкай Арміі.

Працоўная дзейнасць А. Ю. Барышнікава звязана з Анкалагічным навуковым цэнтрам Акадэміі медыцынскіх навук СССР (зараз Расійскі анкалагічны навуковы цэнтр імя М. М. Блахіна Расійскай акадэміі медыцынскіх навук). У 1974–1998 гг. – малодшы, вядучы, галоўны навуковы супрацоўнік, кіраўнік лабараторыі, з 1998 года – намеснік генеральнага дырэктара навукова-даследчага інстытута. А. Ю. Барышнікаў узначальваў Навукова-даследчы інстытут эксперыментальнай дыягностыкі і тэрапіі пухлін Расійскай акадэміі медыцынскіх навук.

Аўтар звыш 350 апублікаваных навуковых прац, 15 вынаходніцтваў. Буйны вучоны ў галіне біятэхналогіі і імуналогіі пухлін, адзін з заснавальнікаў імунадыягностыкі гемабластозаў. Стварыў наборы монакланальных антыцел для дыягностыкі гемабластозаў і ацэнкі імуналагічнага статуса чалавека.

Падрыхтаваў 25 кандыдатаў і 3 дактароў медыцынскіх навук. На працягу многіх гадоў член аб'яднанага вучонага савета Расійскага анкалагічнага навуковага цэнтра Расійскай акадэміі медыцынскіх навук, старшыня вучонага савета НДІ эксперыментальнай дыягностыкі і тэрапіі пухлін, член рэдкалегіі часопісаў «Гематалогия и трансфузиология» і «Вестник РАНЦ РАМН».

ЛІТАРАТУРА

1. Барышнікаў Анатолій Юр'евіч // Памяць: Ушацкі раён : гісторыка-дакументальныя хронікі гарадоў і раёнаў Беларусі / рэдкал.: Г. К. Кісялёў [і інш.] ; уклад. М. М. Кірпіч ; мастак Э. Э. Жакевіч. – Мінск : Белта, 2003. – С. 528.

2. Барышников Анатолий Юрьевич // Гордость здравоохранения Витебщины : биографический справочник / Н. И. Степаненко, Ю. Н. Степаненко. – Витебск : Витебская областная типография, 2009. – С. 64.