Бладыка Нічыпар Міхайлавіч
Бладыка Нічыпар Міхайлавіч – дзяржаўны дзеяч.
Нарадзіўся 15 чэрвеня 1889 года ў в. Рамашкава Талачынскага раёна.
Пасля заканчэння пачатковай школы працаваў лесарубам, конюхам, рабочым на чыгунцы.
У лістападзе 1917 года ўступіў у чырвонагвардзейскі атрад пры Аршанскім рэўкаме, удзельнічаў у баях з белаказакамі, потым з войскамі кайзераўскай Германіі, быў агентам па правядзенні харчразвёрсткі ў войсках ВЧК.
Член КПСС з 1918 года.
У канцы 1919 г. пайшоў на фронт сувязістам, кулямётчыкам 1-й Коннай арміі пад камандаваннем С. М. Будзённага. Ваяваў супраць белагвардзейцаў пад Растовам, белапалякаў пад Львовам, урангелеўцаў і банд Махно.
У 1922 годзе ў ліку 600 будзёнаўцаў накіраваны на вучобу. Скончыў рабфак у Оршы, пасля Маскоўскую сельскагаспадарчую акадэмію імя Ціміразева (1929), аспірантуру Акадэміі сельскагаспадарчых навук імя Леніна (1933).
Працаваў на кіруючых пасадах у сельскагаспадарчых арганізацыях, выкладчыкам Вышэйшай партыйнай школы ў Мінску, вучоным сакратаром Прэзідыума Акадэміі навук БССР.
У 1937 годзе быў рэктарам Беларускага дзяржаўнага ўніверсітэта.
Быў рэпрэсаваны. Пасля 8-гадовага зняволення жыў і працаваў аграномам у Астрахані.
У сярэдзіне 1950-х гадоў рэабілітаваны і адноўлены ў партыі.
Працаваў выкладчыкам у партыйнай школе ў Астрахані.
Больш 20 гадоў кіраваў саветам ветэранаў рэвалюцыі, вайны і працы пры Астраханскім гаркаме КПСС, выбіраўся дэпутатам Астраханскага гарадскога Савета народных дэпутатаў, членам гаркама КПСС.
ЛІТАРАТУРА
1. Бірукоў, В. Узначальваў і Белдзяржуніверсітэт / В. Бірукоў // Наша Талачыншчына. – 2009. – 28 сак. – С. 1.
2. Нічыпар Міхайлавіч Бладыка // Памяць: гісторыка-дакументальная хроніка Талачынскага раёна / рэдкал.: І. П. Шамякін [і інш.] ; мастак А. М. Хількевіч. – Мінск : БелЭн імя П. Броўкі, 1988. – С. 639–640.
СПАСЫЛКІ
Белорусский государственный университет. Никифор Михайлович Бладыко
