Чыр’еў Сяргей Іванавіч
Чыр'еў Сяргей Іванавіч нарадзіўся ў 1850 годзе ў Віцебску. Вучоны ў галіне фізіялогіі. Доктар медыцыны.
Вучыўся ў мясцовай класічнай гімназіі і адначасова ў каморніцка-таксатарскіх класах, што былі пры гімназіі. Разам з атэстатам гімназіі атрымаў званне каморніка-таксатара.
У 1868 годзе паступіў на фізіка-матэматычны факультэт Пецярбургскага ўніверсітэта, які скончыў у 1871 годзе, і застаўся там для падрыхтоўкі да прафесарскага звання. У 1872 годзе С. Чыр'еў паступіў у Пецярбургскую медыка-хірургічную акадэмію, дзе адначасова працаваў асістэнтам пры кафедры фізіялогіі. У 1875 годзе Сяргей Чыр'еў скончыў акадэмію і быў залічаны на ваенна-медыцынскую службу. У 1876 годзе абараніў доктарскую дысертацыю на тэму «Залежнасць сардэчнага рытму ад ваганняў унутрысасудзістага ціску».
Некалькі гадоў правёў за мяжой (1876–1879), працаваў у лепшых фізіялагічных лабараторыях і клініках Германіі, Францыі, Англіі і Аўстрыі. Вярнуўшыся з-за мяжы, у 1880 годзе С. І. Чыр'еў быў прызначаны клінічным прафесарам пры Мікалаеўскім ваенным шпіталі ў Пецярбургу. У наступным годзе атрымаў званне прыват-дацэнта на кафедры фізіялогіі здаровага чалавека ў Кіеўскім універсітэце.
Аўтар шэрагу навуковых прац па фізіялогіі, а таксама артыкулаў у спецыяльных рускіх і замежных часопісах.
Памёр Сяргей Іванавіч у 1915 годзе ў Кіеве.
ЛІТАРАТУРА
1. Подлипский, А. Льву Толстому из Старого Села / А. Подлипский // Жыццё Прыдзвіння (Віцебск). – 2009. – 20 чэрв. – С. 3, 6.
2. Чирьев С. И. // Витебская Александровская гимназия (1808–1918): страницы истории и выпускники / А. М. Подлипский. – Витебск : Витебская областная типография, 1997. – С. 39–41.
3. Чыр'еў Сяргей Іванавіч // Асветнікі зямлі Беларускай, X – пачатак XX ст. : энцыклапедычны даведнік / рэдкал.: Г. П. Пашкоў [і інш.] ; маст. У. М. Жук. – 2-е выд. – Мінск : БелЭн, 2006. – С. 468–469.
4. Чыр'еў Сяргей Іванавіч // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 304–305.
5. Чыр'еў Сяргей Іванавіч // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 180.
СПАСЫЛКІ
