Фабрыкант Веніямін Львовіч нарадзіўся 19 сакавіка 1908 года ў Оршы, вучоны-энергетык, лаўрэат Дзяржаўнай прэміі СССР, заслужаны дзеяч навукі і тэхнікі Латвійскай СССР, доктар тэхнічных навук, прафесар.

Пасля заканчэння ў 1936 г. Маскоўскага энергетычнага інстытута працаваў у Мосэнерга, затым у інстытуце «Цеплаэлектрапраект». У 1941 г. у складзе дывізіі маскоўскіх працоўных В. Л. Фабрыкант удзельнічаў у абароне Масквы.

Уся плённая творчая дзейнасць Веніяміна Львовіча на працягу больш за 50 гадоў была звязана з даследаваннямі ў галіне рэлейнай абароны і аўтаматыкі энергасістэм. У 1941 годзе ён паспяхова абараніў кандыдацкую дысертацыю, а ў 1959 г. – доктарскую. У 1950 годзе за стварэнне эфектыўнай рэлейнай абароны для высокавольтных ліній электраперадач яму ў складзе калектыву навукоўцаў і інжынераў была прысуджана Дзяржаўная прэмія СССР.

У 1960 г. В. Л. Фабрыкант быў запрошаны на працу ў Рыжскі палітэхнічны інстытут, дзе за кароткі тэрмін стварыў школу інжынераў і навуковых работнікаў у галіне аўтаматыкі энергасістэм.

Веніямін Львовіч сваімі працамі зрабіў неацэнны ўклад у тэорыю і практыку рэлейнай абароны энергасістэм. Вынікі яго даследаванняў адлюстраваны больш чым у 100 публікацыях, у тым ліку ў 15 кнігах, шырока вядомых у нашай краіне і за мяжой.

В. Л. Фабрыкант з'яўляецца аўтарам 30 вынаходстваў, ім падрыхтавана 25 кандыдатаў тэхнічных навук. З'яўляючыся членам метадычнага Савета па энергетыцы Міністэрства вышэйшай і сярэдняй спецыяльнай адукацыі СССР, В. Л. Фабрыкант увесь час аказваў дапамогу шматлікім ВНУ краіны ў пастаноўцы спецыяльных дысцыплін па электраэнергетычных спецыяльнасцях.

За перыяд з 1968 па 1981 г. у выдавецтве «Вышэйшая школа» выпусцілі падрыхтаваныя ім сем навучальных дапаможнікаў і адзін падручнік па дысцыпліне «Элементы аўтаматычных прылад». Ім распрацавана методыка найбольш эфектыўнага навучання студэнтаў, якая складаецца ў непарыўным спалучэнні вывучэння тэарэтычных пытанняў з рашэннем практычных задач.

За ўдзел у Вялікай Айчыннай вайне і плённую працу вучонага і педагога В. Л. Фабрыкант узнагароджаны шасцю медалямі.

З такой жа сур'ёзнасцю В. Фабрыкант ставіўся і да паэзіі. Больш за 20 гадоў працаваў ён над паэмай «Фёдар Соеў», якую называюць «роднай сястрой» Яўгена Анегіна.

Напэўна, з-за сваёй незвычайнасці, рукапіс праляжаў больш за 10 гадоў у рэдакцыі часопіса «Даўгава», а потым яго вярнулі ўдаве аўтара.

У 2000 годзе Фелікс Кац выдаў паэму асобнай кніжкай. Праз два гады ўбачыла свет навуковая і філасофская публіцыстыка В. Фабрыканта – пад назвай «Другі пачатак». А яшчэ праз год выйшаў зборнік вершаў «Крокі гісторыі».

ЛІТАРАТУРА

1. Готовская, Л. Ученый с фамилией промышленника / Л. Готовская // Аршанская газета. – 2008. – 22 сак. – С. 2.

2. Мінкевіч, Л. Найперш – паэт / Л. Мінкевіч // Літаратура і мастацтва. – 2008. – 3 кастр. – С. 15.

3. Стрельцов, Г. Душа поэта, ум ученого / Г. Стрельцов // Телеком-экспресс (Орша). – 2008. – 13 марта. – С. 5.

4. Фабрыкант Венеамін Львовіч // Імёны. Асобы. Лёсы : ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 289.