Грынчук Павел Сямёнавіч
Грынчук Павел Сямёнавіч нарадзіўся 17 мая 1976 года ў г. п. Шаркаўшчына. Вучоны ў галіне цеплафізікі, стварэння энергаэфектыўных тэхналогій. Член-карэспандэнт Нацыянальнай акадэміі навук Беларусі (2017), доктар фізіка-матэматычных навук (2014).
Скончыў Беларускі дзяржаўны ўніверсітэт (1998, фізічны факультэт, кафедра тэарэтычнай фізікі). З 1998 года працуе ў Інстытуце цепла- і масаабмену імя А. В. Лыкава НАН Беларусі, з 2012 года – загадчык аддзялення цеплафізікі.
Навуковыя працы ў галіне цеплафізікі, даследаванні праблем гарэння гетэрагенных асяроддзяў са стахастычнай структурай, развіцця матэматычных метадаў апісання стахастычных структур (у прыватнасці, метадаў тэорыі перкаляцыі), стварэння высокатэмпературных кампазіцыйных матэрыялаў. Упершыню прапанавана і абгрунтавана канцэпцыя энергетычных межаў гарэння ў гетэрагенных сумесевых сістэмах. Распрацавана лінейка энергаэфектыўнага пячнога абсталявання, прызначанага для нагрэву, тэрмаапрацоўкі і хіміка-тэрмічнай апрацоўкі металаў.
Аўтар больш за 150 навуковых прац, больш за 60 артыкулаў у часопісах, 13 вынаходак.
З'яўляецца намеснікам кіраўніка падпраграмы «Эфектыўныя цеплафізічныя працэсы і тэхналогіі» Дзяржаўнай праграмы навуковых даследаванняў «Энергетычныя сістэмы, працэсы і тэхналогіі», членам Дзяржаўнага экспертнага савета № 4 «Энергетыка», членам экспертнага савета Міністэрства прамысловасці Рэспублікі Беларусь (па секцыі «Энергаэфектыўнасць»), членам некалькіх рабочых груп, створаных распараджэннямі ўрада для вырашэння пытанняў сацыяльна-эканамічнага развіцця Рэспублікі Беларусь, членам навукова-тэхнічнага савета па развіцці шыннай прамысловасці ў Рэспубліцы Беларусь і інш. Член савета па абароне дысертацый пры Інстытуце цепла- і масаабмену імя А. В. Лыкава НАН Беларусі.
Узнагароджаны прэміяй Нацыянальнай акадэміі навук для маладых навукоўцаў у 2003 годзе. Лаўрэат стыпендыі Прэзідэнта Рэспублікі Беларусь для таленавітых маладых навукоўцаў (2006), атрымаў грант Прэзідэнта Рэспублікі Беларусь у навуцы (2015).
ЛІТАРАТУРА
1. Ананич, Е. Таленавіты вучоны Павел Грынчук / Е. Ананич // Кліч Радзімы (Шаркаўшчына). – 2017. – 16 снеж. – С. 6.
2. Наша родина здесь, над Дисною-рекой... = Our motherland is here over Disna river... : фотоальбом / [Отдел идеологической работы, культуры и по делам молодежи Шарковщинского районного исполнительного комитета]. – Новополоцк : О. В. Молодечкин, 2018. – 38 с.
СПАСЫЛКІ
