Іафінаў Самуіл Абрамавіч нарадзіўся 12 (13) лютага (студзеня) 1909 года ў Віцебску. Вучоны. Доктар тэхнічных навук, прафесар. Сапраўдны член (акадэмік) Міжнароднай акадэміі аграрнай адукацыі, член Пятроўскай акадэміі навук і мастацтваў.

У 1926 годзе скончыў Віцебскі кааператыўны тэхнікум. Працаваў у Аршанскім акрсельгасе, Ленінградскім воблільносаюзе. Прымаў удзел у выпрабаваннях першых савецкіх ільноцерабілак. У 1928 годзе сям'я пераехала ў Ленінград.

У 1936 годзе скончыў Ленінградскі інстытут механізацыі сельскай гаспадаркі (зараз – Санкт-Пецярбургскі дзяржаўны аграрны ўніверсітэт). З 1937 года пачаў настаўніцкую дзейнасць на кафедры «Эксплуатацыя машынна-трактарнага парка» гэтага ж інстытута. У 1940 годзе абараніў кандыдацкую дысертацыю і быў абраны на пасаду дацэнта кафедры.

У гады Вялікай Айчыннай вайны С. А. Іафінаў уступіў у народнае апалчэнне і да канца вайны служыў на Ленінградскім фронце ў аўтамабільных войсках (на Ладажскай лядовай трасе і ў баях пры зняцці блакады Ленінграда кіраваў аўтатранспартам). Пасля дэмабілізацыі і да 1979 года – загадчык кафедры «Эксплуатацыя машынна-трактарнага парка». У 1979 годзе Самуіл Абрамавіч быў прафесарам, потым прафесарам-кансультантам на гэтай кафедры.

Навуковыя працы па тэарэтычных асновах тэхналогіі механізаваных работ, аптымізацыі і аўтаматызацыі рэжымаў работы мабільных сельскагаспадарчых агрэгатаў, энергетыцы і кінематыцы трактарных агрэгатаў, сістэме прыбораў для механізацыі ўліку і кантролю работы агрэгатаў у палявых умовах, гісторыі развіцця сельскагаспадарчай тэхнікі, аграінжынернай навукі і адукацыі.

Аўтар падручнікаў і вучэбных дапаможнікаў па эксплуатацыі машынна-трактарнага парка, механізацыі і электрыфікацыі сельскай гаспадаркі.

У 1971 годзе прафесар С. А. Іафінаў быў удастоены ганаровага звання «Заслужаны дзеяч навукі і тэхнікі РСФСР». Узнагароджаны ордэнамі Працоўнага Чырвонага Сцяга, Чырвонай Зоркі, Айчыннай вайны II ступені (2), медалямі.

Памёр Самуіл Абрамавіч 8 верасня 2002 года.

ЛІТАРАТУРА

1. Іафінаў Самуіл Абрамавіч // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 127–128.

2. Іафінаў Самуіл Абрамавіч // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 76–77.

3. Іафінаў Самуіл Абрамавіч // Памяць: Віцебск : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад. А. І. Мацяюн ; мастак Э. Э. Жакевіч. – Мінск : БелЭн, 2003. – Кн. 2. – С. 529–530.

СПАСЫЛКІ

 Санкт-Петербургский государственный аграрный университет – Иофинов Самуил Абрамович