Ісурын Аляксандр Іосіфавіч
Ісурын Аляксандр Іосіфавіч нарадзіўся 10 жніўня 1916 года ў Віцебску. Спартыўны дзеяч.
Скончыў ваенны інстытут фізічнай культуры ў Ленінградзе. Быў начальнікам спартклуба Ленінградскай ваеннай акругі, намеснікам старшыні Ленінградскага камітэта па фізкультуры і спорце.
З 1939 года – у Чырвонай Арміі. У 1940 годзе Аляксандр Ісурын быў прызначаны начальнікам аддзела фізічнай падрыхтоўкі Ленінградскага франтавога Дома Чырвонай Арміі. Падчас Вялікай Айчыннай вайны заставаўся ў блакадным Ленінградзе. Ініцыятар правядзення масавых спартыўных спаборніцтваў у блакадным горадзе.
Уваходзіў у састаў савецкіх дэлегацый у якасці суддзі на гульнях пяці алімпіяд: 1956, 1964, 1968, 1976, 1980 гадоў. Удзельнік усіх Спартакіяд народаў СССР. Галоўны суддзя легкаатлетычнага матча СССР – ЗША. 34 гады ўзначальваў Федэрацыю лёгкай атлетыкі Ленінграда і быў членам Прэзідыума Усесаюзнай федэрацыі лёгкай атлетыкі. Суддзя міжнароднай катэгорыі па спартыўнай хадзьбе. Аўтар кніг па гісторыі спорту.
Аляксандр Іосіфавіч Ісурын – лаўрэат ганаровых званняў: «Ганаровы старшыня Федэрацыі лёгкай атлетыкі Санкт-Пецярбурга», «Ганаровы суддзя па спорце», «Заслужаны трэнер РСФСР», «Заслужаны работнік фізічнай культуры Расійскай Федэрацыі». Узнагароджаны ордэнамі Чырвонай Зоркі і іншымі, медалямі «За баявыя заслугі», «За абарону Ленінграда», «За перамогу над Германіяй у Вялікай Айчыннай вайне 1941–1945 гг.», нагруднымі знакамі «За заслугі ў развіцці алімпійскага руху ў Расіі», «За заслугі ў развіцці фізічнай культуры і спорту», «Выдатнік фізічнай культуры і спорту» і інш.
Памёр Аляксандр Іосіфавіч 13 красавіка 2013 года.
ЛІТАРАТУРА
1. Ісурын Аляксандр Іосіфавіч // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 129–130.
2. Ісурын Аляксандр Іосіфавіч // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 78.
3. Ісурын Аляксандр Іосіфавіч // Памяць: Віцебск : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад. А. І. Мацяюн ; мастак Э. Э. Жакевіч. – Мінск : БелЭн, 2003. – Кн. 2. – С. 530.
СПАСЫЛКІ
