Кавалеўскі Георгій Ціханавіч – удзельнік Вялікай Айчыннай вайны, вучоны-эканаміст.

Нарадзіўся 15 красавіка 1918 года ў вёсцы Мацюшына Сцяна Лепельскага раёна.

Закончыў Лепельскае педагагічнае вучылішча (1936), Віцебскі педагагічны інстытут (1940), Усесаюзны завочны фінансавы інстытут (1949), Акадэмію грамадскіх навук пры ЦК ВКП(б) (1950).

Працаваў настаўнікам ва Ушацкім раёне, дырэктарам няпоўнай сярэдняй школы.

З 1950 года – загадчык кафедры, з 1951 – намеснік дырэктара Рэспубліканскай партыйнай школы пры ЦК КП(б)Б.

Узначаліваў Інстытут эканомікі Акадэміі навук БССР (1952–1964), працаваў там загадчыкам сектара палітэканоміі (1964–1973), загадчыкам кафедры палітэканоміі Інстытута павышэння кваліфікацыі выкладчыкаў вузаў пры БДУ імя Леніна (1973–1978).

Кандыдат эканамічных навук (1950), прафесар (1976).

Дэпутат Вярхоўнага Савета БССР у 1955–1963 гг., старшыня бюджэтнай камісіі Вярхоўнага Савета.

У 1960–1964 гг. прадстаўляў БССР у Еўрапейскай эканамічнай камісіі.

У 1981 годзе – Заслужаны дзеяч навукі Рэспублікі Беларусь.

Аўтар звыш 70 навуковых работ, сярод якіх манаграфіі «Пытанні аплаты працы ў калгасах Беларусі» (1959), «Катэгорыі і законы размеркавальных адносін сацыялізму» (1968), «Кошт ва ўмовах сацыялізму» (1971), «Формы чыстага даходу пры сацыялізме» (1973), «Заканамернасць адукацыі кошту пры сацыялізме» (1982).

Памёр 24 мая 2008 года.

ЛІТАРАТУРА

1. Кавалеўскі Георгій Ціханавіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1998. – Т. 7 : Застаўка–Кантата. – С. 392.

2. Кавалеўскі Георгій Ціханавіч // Памяць: Лепельскі раён : гісторыка-дакументальныя хронікі гарадоў і раёнаў Беларусі / рэдкал.: В. Я. Ланікіна [і інш.] ; уклад.: В. Я. Ланікіна, А. У. Стэльмах ; мастак Э. Э. Жакевіч. – Мінск : Беларусь, 1999. – С. 569.

3. Ковалевский Георгий Тихонович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 498.