Корсак Тадэвуш нарадзіўся каля 1741 года ў в. Заскаркі Полацкага раёна, дзяржаўны і ваенны дзеяч Вялікага княства Літоўскага.

Паходзіў з роду Корсакаў. Па пратэкцыі караля Станіслава Аўгуста Панятоўскага Тадэвуш Корсак у 1787 годзе стаў віленскім земскім суддзёй. Быў адным з самых актыўных паслоў ад ВКЛ на чатырохгадовым сейме 1788–1792 гг., дамагаўся стварэння асобнай для ВКЛ скарбовай і паліцэйскай адміністрацыі. У пачатку паўстання 1794 года ў ВКЛ прыбыў у Вільню на чале некалькіх дзясяткаў узброеных навакольных і ўласных сялян. У маі 1794 года ўвайшоў у склад паўстанцкай парадкавай камісіі Віленскага ваяводства. 19–20 ліпеня 1794 года ўдзельнічаў у абароне Вільні разам з атрадам генерала Меена. 31 жніўня 1794 года Т. Корсак атрымаў ад Т. Касцюшкі званне генерал-маёра.

Загінуў 4 лістапада 1794 года пры абароне Прагі. Пахаваны разам з Я. Ясінскім пры варшаўскім касцёле «На Камёнку».

ЛІТАРАТУРА

1. Корсак Тадэвуш // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 165.

2. Корсак Тадэвуш // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 98.

3. Корсак Тадэвуш // Памяць: Полацкі раён : гісторыка-дакументальныя хронікі гарадоў і раёнаў Беларусі / рэдкал.: І. Б. Каросцік, Р. І. Маслоўскі, А. Л. Петрашкевіч ; уклад. С. С. Чарняўская ; маст. Э. Э. Жакевіч. – Мінск : Вышэйшая школа, 1999. – С. 642.

4. Корсак Тадэвуш // Энцыклапедыя гісторыі Беларусі : у 6 т. / рэдкал.: Г. П. Пашкоў [і інш.] ; маст. Э. Э. Жакевіч. – Мінск : БелЭн, 1997. – Т. 4 : Кадэты–Ляшчэня. – С. 239.