Крукоўскі Мікалай Ігнатавіч нарадзіўся 16 лістапада 1923 года ў в. Машкова Аршанскага раёна, беларускі эстэтык і мовазнавец. Кандыдат філалагічных навук, дацэнт.

У 1938 годзе сям'я пераехала ў Оршу. Тут у 1940 годзе Мікалай скончыў 10 класаў 2-й сярэдняй школы і быў прыняты ў Віцебскі ветэрынарны інстытут.

У 1941 годзе, скончыўшы 1 курс інстытута, добраахвотнікам пайшоў на фронт. Мікалая накіравалі ў школу малодшых камандзіраў стралковага палка пад Смаленскам. У 1942 годзе пайшоў у партызанскі атрад – ваяваў у дыверсійнай групе, пазней стаў начальнікам штаба аднаго з атрадаў 2-й Заслонаўскай брыгады.

Пасля заканчэння вайны ў 1945 годзе М. І. Крукоўскі паступіў на I курс філалагічнага факультэта Беларускага дзяржаўнага ўніверсітэта. Пасля заканчэння працаваў у Інстытуце мовазнаўства АН БССР.

У 1956 годзе абараніў кандыдацкую дысертацыю па філалогіі, і ў 1963 годзе перайшоў на працу ў Беларускі дзяржаўны ўніверсітэт на кафедру гісторыі філасофіі, логікі і эстэтыкі.

Мікалай Ігнатавіч Крукоўскі – аўтар шматлікіх навуковых прац, артыкулаў па праблемах сучаснай эстэтыкі, культуралогіі, пытаннях станаўлення нацыянальнай самасвядомасці, суверэнітэту.

Актыўна займаўся грамадскай дзейнасцю. У 1994 годзе быў адным са стваральнікаў Беларускай Хрысціянскай Дэмакратычнай партыі.

У 1990-я гады ўдзельнічаў у шматлікіх грамадскіх ініцыятывах, у навуковых праграмах Нацыянальнага навукова-адукацыйнага цэнтра імя Ф. Скарыны, публікаваўся з навукова-папулярнымі і палемічнымі артыкуламі ў перыядычных выданнях. У 1996 годзе ўваходзіў у склад Грамадскага камітэта абароны беларускай нацыянальнай сімволікі. І ў гэты ж час працягваў фундаментальную навуковую працу.

Памёр Мікалай Ігнатавіч 30 верасня 2013 года.

ЛІТАРАТУРА:

1. Крукоўскі Мікалай Ігнатавіч // Памяць: Орша. Аршанскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад.: Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 2000. – Кн. 2. – С. 431.

2. Крукоўскі Мікалай Ігнатавіч // Энцыклапедыя літаратуры і мастацтва Беларусі : у 5 т. / рэдкал.: І. П. Шамякін [і інш.]. – Мінск : БелСЭ імя П. Броўкі, 1986. – Т. 3 : Карчма–Найгрыш. – С. 131.

3. Юцова, В. Мікалай Ігнатавіч Крукоўскі / В. Юцова // Аршанская газета. – 2000. – 4 крас. – С. 3.