Кузьміцкі Баляслаў Браніслававіч нарадзіўся 20 красавіка 1931 года ў в. Пасекі Докшыцкага раёна. Беларускі вучоны ў галіне фармакалогіі. Доктар медыцынскіх навук (1974), прафесар (1978). Скончыў Мінскі медыцынскі інстытут (1958). Працаваў галоўным урачом Даўгінаўскай бальніцы Крывіцкага раёна Мінскай вобласці (1959–1960). 3 1963 г. на кафедры фармакалогіі Мінскага медінстытута, з 1974 г. – дацэнт кафедры, з 1976 г. – загадчык гэтай кафедры. 3 1982 г. – загадчык аддзела біядаследаванняў Інстытута біяарганічнай хіміі НАН Беларусі, з 1993 года – кіраўнік медыка-эксперыментальнага сектара інстытута.

Напрамкі навуковай дзейнасці: пытанні хімічнай, біяхімічнай, радыяцыйнай фармакалогіі; нейрамарфалогія; імунафармакалогія; фармакалогія нізкамалекулярных біярэгулятараў і інш.

Вывучаў фармакалагічную актыўнасць стэроідных злучэнняў, працаваў над праблемай імунамадулятараў. Распрацаваў імунамадулятар трымезон і падрыхтаваў яго да клінічных выпрабаванняў. Атрымаў імунамадулятары новага тыпу, гастрапратэктары і радыёадаптагены на аснове сінтэтычных аналагаў простагландынаў.

Працаваў над падрыхтоўкай і правядзеннем рэспубліканскага з'езда і навуковых канферэнцый па праблемах фармакалогіі. Прымаў удзел у арганізацыі IV Усесаюзнага з'езда фармаколагаў. Удзельнік міжнародных навуковых сімпозіумаў і канферэнцый (1978, 1986, 1993).

Аўтар 200 навуковых прац, 40 аўтарскіх пасведчанняў на вынаходствы. Быў старшынёй праўлення Беларускага навуковага таварыства фармаколагаў і таксіколагаў (1974–1982), праблемнай камісіі Вучонага медыцынскага савета Міністэрства аховы здароўя БССР; член фармакапейных камітэта РБ, экспертнага савета па навукова-тэхнічнай праграме, 2 спецыялізаваных саветаў.

У 2011 годзе за вялікі асабісты ўклад у развіццё фармакалогіі біярэгулятараў і іх сінтэтычных аналагаў, плённую навуковую дзейнасць і падрыхтоўку навуковых кадраў вышэйшай кваліфікацыі галоўны навуковы супрацоўнік Інстытута біяарганічнай хіміі НАН Беларусі, доктар медыцынскіх навук, прафесар Кузьміцкі Баляслаў Браніслававіч узнагароджаны Ганаровай граматай НАН Беларусі.

ЛІТАРАТУРА

1. Кузьміцкі Баляслаў Браніслававіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1999. – Т. 8 : Канто–Кулі. – С. 564.

2. Кузьміцкі Баляслаў Браніслававіч // Памяць: Докшыцкі раён : гісторыка-дакументальныя хронікі гарадоў і раёнаў Беларусі / рэдкал.: Г. П. Пашкоў [і інш.] ; уклад. А. В. Скараход ; мастак Э. Э. Жакевіч. – Мінск : БелЭн, 2004. – С 627.

3. Кузьмицкий Болеслав Брониславович // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн, 2007. – Т. 4 : Картография–Миноговые – С. 338.