Лабуноў Уладзімір Архіпавіч нарадзіўся 16 сакавіка 1939 года ў в. Новае Хорабрава Аршанскага раёна, беларускі вучоны ў галіне мікраэлектронікі. Доктар тзхнічных навук (1975), прафесар.

У 1956 годзе скончыў сярэднюю школу ў Оршы. Займаўся спартыўнай гімнастыкай. Пасля заканчэння сярэдняй школы паступіў у Беларускі політэхнічны інстытут (зараз БНТУ). З 1963 года У. А. Лабуноў – аспірант Беларускага політэхнічнага інстытута. У 1966 годзе ён абараніў кандыдацкую дысертацыю.

У 1967–1986 гг У. А. Лабуноў праходзіў навуковую стажыроўку ва Універсітэце Браўна (ЗША) у галіне мікраэлектронікі. У 1971 годзе У. А. Лабуноў абараніў доктарскую дысертацыю. У 1973–1974 гг. знаходзіўся на навуковай працы ў Інстытуце фундаментальнай электронікі Парыжскага ўніверсітэта.

У 1975 годзе быў абраны загадчыкам кафедры мікраэлектронікі Мінскага радыётэхнічнага інстытута. У 1976 годзе У. А. Лабуноў знаходзіўся на навуковай працы ў Капенгагенскім універсітэце (Данія).

У 1982 годзе Уладзімір Архіпавіч быў абраны членам-карэспандэнтам АН БССР па спецыяльнасці «мікраэлектроніка», у 1986 годзе – правадзейным членам (акадэмікам) АН БССР па той жа спецыяльнасці, а ў 1987 годзе – акадэмікам-сакратаром аддзялення фізікі, матэматыкі і інфарматыкі АН БССР і працаваў на гэтай пасадзе да 1989 года.

За перыяд з 1968 па 1989 гг. Уладзімірам Архіпавічам было падрыхтавана 78 кандыдатаў навук, 9 з якіх сталі дактарамі навук. Вынікі навуковых даследаванняў У. А. Лабунова выдадзены больш чым у 250 публікацыях.

За высокія дасягненні ў галіне навукі і тэхнікі У. А. Лабунову прысвоена званне «Заслужаны вынаходнік Беларускай ССР». У 1978 годзе ён узнагароджаны Першай прэміяй Прэзідыума АН СССР за лепшыя фундаментальныя распрацоўкі ў галіне мікраэлектронікі, а ў 1992 годзе прысвоена званне лаўрэата Дзяржаўнай прэміі Рэспублікі Беларусь. У. А. Лабуноў узнагароджаны ордэнамі Кастрычніцкай рэвалюцыі, Працоўнага Чырвонага Сцяга і медалем «За працоўную доблесць».

З 1989 года па 1991 год Уладзімір Архіпавіч з'яўляўся членам Вярхоўнага Савета СССР і знаходзіўся на працы ў Маскве. У 1991–1994 гг. У. А. Лабуноў – загадчык кафедры мікраэлектронікі Мінскага радыётэхнічнага інстытута. У 1990–1994 гг. з’яўляўся членам Калегіі МЗС Рэспублікі Беларусь.

З 1994 года па 2002 год У. А. Лабуноў – надзвычайны і паўнамоцны пасол Рэспублікі Беларусь у Бельгіі, Нідэрландах і Люксенбургу. У 1997–1999 гг. – віцэ-прэзідэнт Навукова-тэхнічнай праграмы Еўрапейскага саюза INTAS.

У цяперашні час акадэмік Уладзімір Архіпавіч Лабуноў з'яўляецца членам Прэзідыума НАН Беларусі, вядучым навуковым супрацоўнікам Беларускага дзяржаўнага ўніверсітэта інфарматыкі і радыёэлектронікі.

ЛІТАРАТУРА

1. Бардон, У. Я. Лабуноў Уладзімір Архіпавіч / У. Я. Бардон // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1999. – Т. 9 : Кулібін–Малаіта. – С. 83–84.

2. Лабунов Владимир Архипович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 18.

3. Лабунов Владимир Архипович // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн, 2007. – Т. 4 : Картография–Миноговые. – С. 387.

4. Лабунов Владимир Архипович // Ученые-уроженцы Витебщины – для инновационной Беларуси / А. В. Русецкий, Н. К. Толочко. – Витебск : ВГУ им. П. М. Машерова, 2007. – С. 74–76. 

5. Лабунов, В. Преодоление высоты / В. Лабунов // Наука и инновации. – 2009. – № 3. – С. 21–25.

6. Лабуноў Уладзімір Архіпавіч // Памяць: Орша. Аршанскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад.: Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 2000. – Кн. 2. – С. 435.

7. Ля штурвала беларускай навукі // Зямля Караткевіча / І. А. Яршоў, В. М. Сіднякова. – Орша : Аршанская друкарня, 1997. – С. 235.