Ласкаўнёў Аляксандр Пятровіч нарадзіўся 23 сакавіка 1949 года ў г. п. Расоны.

Беларускі вучоны ў галіне матэрыялазнаўства.

Доктар тэхнічных навук (2004).

Член-карэспандэнт (2009). Акадэмік НАН Беларусі (2014).

У 1972 годзе скончыў Беларускі політэхнічны інстытут.

У 1974–1975 гг. – інжынер-канструктар Мінскага гадзіннікавага завода.

З 1975 года – у Фізіка-тэхнічным інстытуце НАН Беларусі (з 1989 года – загадчык лабараторыі, з 2003 года – намеснік дырэктара па навуковай рабоце).

З 2014 года – акадэмік-сакратар аддзялення фізіка-тэхнічных навук НАН Беларусі.

Навуковыя працы па парашковай металургіі, ліцці і апрацоўцы ціскам алюмінія і яго сплаваў.

Зрабіў уклад у развіццё тэорыі і тэхналагічных асноў малаадходнай вытворчасці кампазіцыйных матэрыялаў з выкарыстаннем алюмініевых парашкоў.

Распрацаваў і ўкараніў у вытворчасць новыя антыфрыкцыйныя сплавы, нарматыўную базу прымянення кампазіцыйных матэрыялаў, што дазволіла выкарыстоўваць новыя матэрыялы пры праектаванні вузлоў трэння машын і механізмаў.

Аўтар манаграфіі «Кампазіцыйныя матэрыялы на аснове парашковых сплаваў алюмінія» (2002). Адзін з аўтараў манаграфіі «Вытворчасць алюмініевых поршняў для высокафарсіраваных рухавікоў унутранага згарання» (2004).

Прэміі Міністэрства прамысловасці Рэспублікі Беларусь: за распрацоўку і асваенне серыйнай вытворчасці дэталяў рухавікоў з алюмініевых кампазіцыйных антыфрыкцыйных матэрыялаў (2002), за распрацоўку і асваенне серыйнай вытворчасці алюмініевых поршняў для рухавікоў унутранага згарання (2003), за распрацоўку і асваенне тэхналогіі перапрацоўкі алюмініевых адходаў (стружкі, шлакі) для серыйнай вытворчасці алюмініевага ліцця і маналітных вогнетрывалых матэрыялаў (2006).

Прэмія НАН Беларусі (2013) за цыкл работ «Распрацоўка і даследаванне новых рэсурсазберагальных тэхналогій вытворчасці дэталяў для патрэб айчыннага маторабудавання з укараненнем іх у вытворчасць».

Прэмія НАН Беларусі і Сібірскага аддзялення РАН (2014).

Аўтар больш за 190 навуковых прац, у тым ліку 4 манаграфій, 35 аўтарскіх пасведчанняў і патэнтаў.

ЛІТАРАТУРА

1. Ласковнёв Александр Петрович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 30.

2. Ласковнёв Александр Петрович // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн, 2007. – Т. 4 : Картография–Миноговые. – С. 409.

3. Ласковнёв Александр Петрович // Национальная академия наук Беларуси: персональный состав, 1928–2015 / сост.: Т. С. Буденкова [и др.] ; редсов.: В. Г. Гусаков [и др.]. – Минск : Беларуская навука, 2016. – С. 144–145.