Лазарэвіч-Шапялевіч Леў Юльянавіч нарадзіўся 1 кастрычніка 1863 года ў Віцебску. Гісторык літаратуры, археолаг. Доктар філалогіі.

У 1882 годзе скончыў Віцебскую гімназію, у 1887 годзе – Харкаўскі і Новарасійскі ўніверсітэты. 3 1892 года – магістр усеагульнай літаратуры, з 1896 года – доктар філалогіі, дацэнт, прафесар Харкаўскага ўніверсітэта.

Даследаваў заходнееўрапейскую літаратуру: «Эцюды пра Дантэ» (1891), «Дантаўская трылогія» (1892), «Першы публіцыст у Еўропе Эразм Ратэрдамскі» (1895), «Нашы сучаснікі» (1899), «Нарысы з гісторыі сярэдневяковай літаратуры і культуры» (1900), «Жыццё Сервантэса» (1901), «Дон Кіхот» (1903) і інш.

У 1890–1904 гг. праводзіў археалагічныя раскопкі старажытнаславянскіх курганоў у Гарадоцкім, Невельскім, Себежскім паветах. Пры даследаванні крывіцкіх курганоў выявіў каштоўныя знаходкі, якія паступілі ў фонды Эрмітажа, гістарычных музеяў Масквы і Харкава, музея Віцебскага статыстычнага камітэта.

Леў Юльянавіч з'яўляецца адным з аўтараў «Энцыклапедычнага слоўніка Бракгаўза і Ефрона».

Памёр Леў Юльянавіч 28 студзеня 1909 года.

ЛІТАРАТУРА

1. Каханоўскі, Г. А. Лазарэвіч-Шапялевіч (Шапялевіч) Леў Юльянавіч / Г. А. Каханоўскі // Археалогія Беларусі : энцыклапедыя : у 2 т. / рэдкал.: Т. У. Бялова [і інш.] ; склад. Ю. У. Каласоўскі. – Мінск : БелЭн імя П. Броўкі, 2011. – Т. 2 : Л–Я. – С. 6.

2. Лазарэвіч-Шапялевіч Леў Юльянавіч // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 309–310.

3. Лазарэвіч-Шапялевіч Леў Юльянавіч // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 183.

4. Мядзведзева, В. У. Археолагі-ўраджэнцы Віцебскай зямлі: працы, здабыткі, вынікі / В. У. Мядзведзева // Віцебскія старажытнасці : матэрыялы навуковай канферэнцыі, прысвечанай 90-годдзю з дня нараджэння Л. В. Аляксеева, Віцебск, 28–29 кастрычніка 2010 г. / рэдкал.: Г. У. Савіцкі, В. А. Шышанаў, Н. Ю. Шаркоўская. – Мінск : Медисонт, 2012. – С. 421–434.

5. Шапялевіч (Лазарэвіч-Шапялевіч) Леў Юльянавіч // Асветнікі зямлі Беларускай, X – пачатак XX ст. : энцыклапедычны даведнік / рэдкал.: Г. П. Пашкоў [і інш.] ; маст. У. М. Жук. – 2-е выд. – Мінск : БелЭн, 2006. – С. 472.