Левін Барыс Міхайлавіч нарадзіўся 29 чэрвеня 1914 года ў Віцебску. Беларускі акцёр.

У 1937 годзе скончыў Беларускую студыю пры Цэнтральным тэатральным вучылішчы ў Ленінградзе. У 1931–1934 гг. працаваў у Тэатры юнага гледача Беларусі, Віцебскім ТРАМе, БДТ-3. У 1938–1983 гг. – у Беларускім тэатры імя Я. Коласа.

Вызначальным для творчай індывідуальнасці было майстэрства стварэння падкрэслена вонкавага малюнка ролі, выкарыстанне разнастайных камедыйных сродкаў – гратэску, буфанады і інш. Вядомы як выканаўца характарных камедыйных роляў. Сярод іх: Паніч («Раскіданае гняздо» Я. Купалы), пан Бараноўскі («Несцерка» В. Вольскага), Рабінін («Святло з Усходу» П. Глебкі), Дзед («Зацюканы апостал» А. Макаёнка), Альховік («Трывога» А. Петрашкевіча), Капелан («Дамы і гусары» А. Фрэдры), Прапацей («Ягор Булычоў і іншыя»), Сініцын («Так і будзе» К. Сіманава), Кісель («Многа шуму з нічога» У. Шэкспіра), Нагель («Людзі і д'яблы» К. Крапівы) і іншыя.

У 1967 годзе Барыс Міхайлавіч Левін быў удастоены ганаровага звання «Заслужаны артыст БССР».

Памёр Барыс Міхайлавіч 22 лістапада 1990 года.

ЛІТАРАТУРА

1. 70 гадоў з дня нараджэння Барыса Міхайлавіча Левіна, беларускага акцёра, заслужанага артыста БССР // Мастацтва Беларусі. – 1984. – № 7. – С. 76.

2. Валодзько, Г. Годы сталасці, годы прызнання / Г. Валодзько // Віцебскі рабочы. – 1974. – 1 ліп. – С. 3.

3. Левин Борис Михайлович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 32.

4. Маркіна, Г. П. Левін Барыс Міхайлавіч / Г. П. Маркіна // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1999. – Т. 9 : Кулібін–Малаіта. – С. 179.

5. Маркіна, Г. П. Левін Барыс Міхайлавіч / Г. П. Маркіна // Культура Беларусі : энцыклапедыя : у 6 т. / рэдкал.: Т. У. Бялова [і інш.]. – Мінск : БелЭн імя П. Броўкі, 2014. – Т. 5 : Л–М. – С. 41–42.

6. Маркіна, Г. П. Левін Барыс Міхайлавіч / Г. П. Маркіна // Тэатральная Беларусь : энцыклапедыя : у 2 т. / рэдкал.: Г. П. Пашкоў [і інш.]. – Мінск : БелЭн, 2003. – Т. 2 : Л–Я. – С. 16.

7. Подлипский, А. М. Заслуженный артист БССР Борис Левин / А. М. Подлипский. – Витебск : Витебская областная типография, 2007. – 80 с. – (Жизнь замечательных людей Витебщины).