Лянкевіч Габрыэль нарадзіўся 15 сакавіка 1722 года каля Полацка, каталіцкі рэлігійны дзеяч, архітэктар, педагог.

З 1745 года – член ордэна езуітаў. Вучыўся ў Рымскім езуіцкім калегіуме (1762–1765 гг.). У 1765–1773 гг. выкладаў філасофію, архітэктуру і матэматыку ў калегіумах Нясвіжа і Полацка. Пасля выдання ў 1773 годзе папскай булы аб скасаванні ордэна разам з С. Чарневічам дабіўся захавання дзейнасці езуітаў у межах Расійскай імперыі і адкрыцця ў 1780 годзе ў Полацку навіцыята (установа для падрыхтоўкі да ўступлення ў члены ордэна). З 1782 года – рэктар Полацкага езуіцкага калегіума. У 1785–1798 гг. – генеральны вікарый (выконваючы абавязкі генерала) ордэна езуітаў. Аўтар шэрагу архітэктурных праектаў.

Памёр Габрыэль Лянкевіч 10 лістапада 1798 года.

ЛІТАРАТУРА

1. Лянкевіч Габрыэль // Памяць: Полацкі раён : гісторыка-дакументальныя хронікі гарадоў і раёнаў Беларусі / рэдкал.: І. Б. Каросцік, Р. І. Маслоўскі, А. Л. Петрашкевіч ; уклад. С. С. Чарняўская ; мастак Э. Э. Жакевіч. – Мінск : Вышэйшая школа, 1999. – С. 643.

2. Лянкевіч Габрыэль // Энцыклапедыя гісторыі Беларусі : у 6 т. / рэдкал.: Г. П. Пашкоў [і інш.] ; маст. Э. Э. Жакевіч. – Мінск : БелЭн, 1997. – Т. 4 : Кадэты–Ляшчэня. – С. 425.