Меркін Генадзь Самуйлавіч нарадзіўся 23 сакавіка 1940 года ў Віцебску ў сям'і служачага-чыгуначніка. Вучоны ў галіне філалогіі і літаратуразнаўства. Кандыдат філалагічных навук. Доктар педагагічных навук, прафесар.

У 1957 годзе скончыў сярэднюю школу і паступіў на філалагічнае аддзяленне Полацкага педагагічнага інстытута імя Ф. Скарыны. Праз два гады ў сувязі з расфарміраваннем гэтага інстытута быў пераведзены ў Магілёўскі педагагічны інстытут, які скончыў у 1962 годзе.

Займацца праблемамі літаратурнай крытыкі і літаратуразнаўства пачаў яшчэ ў студэнцкія гады. Актыўна друкаваўся ў абласным і рэспубліканскім перыядычным друку – газетах «Віцебскі рабочы», «Магілёўская праўда», «Знамя юности», «Звязда», «Літаратура і Мастацтва», «Чырвоная змена» і інш.

У 1962–1981 гг. працаваў у школах г. Вязьмы Смаленскай вобласці: завучам у школе рабочай моладзі, загадчыкам метадычнага кабінета ГарАНА, настаўнікам рускай мовы і літаратуры, дырэктарам сярэдняй школы № 5. У 1981–1995 гг. – дацэнт кафедры літаратуры Смаленскага педагагічнага інстытута.

Мае звыш 400 артыкулаў па праблемах філалогіі, літаратуразнаўства і методыкі выкладання літаратуры ў сярэдняй і вышэйшай школе, аўтар больш за 20 кніг (манаграфій, вучэбных дапаможнікаў, падручнікаў для сярэдняй школы).

Пад яго кіраўніцтвам у 1985 годзе ў п. Усходы Угранскага раёна Смаленскай вобласці, на радзіме М. В. Ісакоўскага, быў створаны адзіны ў Расіі літаратурны музей адной песні – славутай «Кацюшы» М. I. Блантэра і М. В. Ісакоўскага.

На працягу многіх гадоў Генадзь Самуйлавіч з'яўляецца членам журы Усерасійскай алімпіяды па літаратуры, старшынёй і сустаршынёй журы алімпіяды Саюзнай дзяржавы «Расія – Беларусь: гістарычная і духоўная супольнасць».

Жыве ў Смаленску.

ЛІТАРАТУРА

1. Меркин Генадий Самуйлович // Белорусские смоляне, смоленские белорусы : биобиблиографический справочник / сост.: Т. Н. Ладожина [и др.] ; отв. ред. и авт. вступ. ст. Д. Н. Бакун. – Смоленск : Издательство СмолГУ, 2017. – Ч. 1 : Персоналии российско-белорусского приграничья. – С. 202.

2. Меркін Генадзь // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 195–196.

3. Меркін Генадзь // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 115–116.

4. Подвижник земли Смоленской: к юбилею Г. С. Меркина // Литература в школе. – 2010. – № 6. – С. 23–24.

5. Соловьева, Ф. Е. «...Мне кажется необыкновенно важным ... любить свою работу, любить детей»: Ганнадию Самуйловичу Меркину – 75 лет! / Ф. Е. Соловьева, Э. В. Костерина // Литература в школе. – 2015. – № 6. – С. 12–13.

СПАСЫЛКІ

 Геннадий Меркин: «Из школы потихоньку уходит слово любовь...»