Міхаль Галіна Васілеўна
Міхаль (Савенкова) Галіна Васілеўна нарадзілася ў 1961 г. у в. Беразіно Докшыцкага раёна. Беларуская спартсменка, трэнер па дзюдо і самба. Скончыла Беларускі інстытут фізкультуры. Неаднаразовы прызёр і пераможца ўсесаюзных і міжнародных спаборніцтваў. Чэмпіёнка СССР па дзюдо ў вагавай катэгорыі 72 кг (1988, Архангельск). Чэмпіёнка СССР (1989), свету (1989, ЗША) і Еўропы (1993, Ржэў, Расія) па самба. Майстар спорту міжнароднага класа па дзюдо і самба. Бронзавы прызёр Алімпійскіх гульняў сярод ваеннаслужачых (1998, Загрэб, Харвація) па самба ў камандным і асабістым заліку.
3 1994 г. на трэнерскай рабоце. Трэнер вышэйшай кваліфікацыйнай катэгорыі спартыўнага таварыства «Дынама» (старшы трэнер-выкладчык СДЮШАР № 1). Са сваімі выхаванцамі выязджала на спаборніцтвы ў Данію, Польшчу, Францыю, Індыю, іншыя краіны. Сярод яе выхаванцаў 3 майстры спорту, сярэбраны і бронзавы прызёры маладзёжнага першынства Еўропы па самба (1999). Падрыхтавала бронзавага прызёра чэмпіянатаў свету і Еўропы, шматразовага прызёра першынстваў свету і Еўропы сярод юніёраў Святлану Цімашэнка, бронзавага прызёра чэмпіянату свету, удзельніцу XXXI Алімпійскіх гульняў у Рыа-дэ-Жанейра Дар'ю Скрыпнік, прызёра чэмпіянатаў свету і Еўропы сярод паралімпійцаў, удзельніцу Паралімпійскіх гульняў у Рыа-дэ-Жанейра Арыну Качан.
За дасягнутыя поспехі ў трэнерскай дзейнасці ў 2016 годзе Указам Прэзідэнта Рэспублікі Беларусь ёй прысвоена званне «Заслужаны трэнер Рэспублікі Беларусь».
ЛІТАРАТУРА
1. Міхаль Галіна Васілеўна // Памяць: Докшыцкі раён : гісторыка-дакументальныя хронікі гарадоў і раёнаў Беларусі / рэдкал.: Г. П. Пашкоў [і інш.] ; уклад. А. В. Скараход ; мастак Э. Э. Жакевіч. – Мінск : БелЭн, 2004. – С. 634.
СПАСЫЛКІ
