Нямёнаў Міхаіл Ісаевіч
Нямёнаў Міхаіл Ісаевіч нарадзіўся 17 (29) студзеня 1880 года ў Віцебску. Вучоны ў галіне радыялогіі і рэнтгеналогіі. Доктар біялагічных навук, доктар медыцынскіх навук, прафесар.
У 1905 годзе скончыў медыцынскі факультэт Берлінскага ўніверсітэта. Пасля яго заканчэння прайшоў двухгадовую спецыялізацыю па рэнтгеналогіі ў Германіі. У 1906–1918 гг. працаваў у Петраградскім медыцынскім інстытуце. У 1918 годзе сумесна з А. Ф. Іофе арганізаваў у Петраградзе першы ў свеце Дзяржаўны рэнтгеналагічна-радыёлагічны інстытут, які ўзначальваў на працягу 30 гадоў. У 1919 заснаваў часопіс «Вестник рентгенологии и радиологии», а таксама асацыяцыю рэнтгенолагаў і радыёлагаў.
З 1939 года – у Чырвонай Арміі, начальнік кафедры рэнтгеналогіі Ваенна-медыцынскай акадэміі імя Кірава. У гады Вялікай Айчыннай вайны – галоўны рэнтгенолаг фронту, пазней – галоўны рэнтгенолаг Чырвонай Арміі.
Званне «генерал-маёр медыцынскай службы» Міхаілу Ісаевічу Нямёнаву было прысвоена 1 лютага 1943 года.
Аўтар шэрагу навуковых прац па даследаванні ўплыву рэнтгенаўскіх прамянёў на палавыя залозы і вегетатыўную нервовую сістэму, аўтар падручнікаў, вынаходніцтваў, медыцынскіх прылад. Ганаровы член Аўстрыйскай асацыяцыі радыёлагаў і Італьянскай асацыяцыі рэнтгенолагаў.
Узнагароджаны ордэнамі Леніна, Працоўнага Чырвонага Сцяга, Айчыннай вайны I ступені, Чырвонага Сцяга (2), Чырвонай Зоркі (2), медалямі. «Заслужаны дзеяч навукі РСФСР».
Памёр Міхаіл Ісаевіч 3 лютага 1950 года ў Ленінградзе.
ЛІТАРАТУРА
1. Нямёнаў Міхаіл Ісаевіч // Імёны. Асобы. Лёсы: ураджэнцы Віцебшчыны ў далёкім і блізкім замежжы / М. П. Кузьміч, М. І. Сцепаненка. – Мінск : Літаратура і мастацтва, 2012. – С. 206.
2. Нямёнаў Міхаіл Ісаевіч // Нашы землякі ў далёкім і блізкім замежжы : біяграфічны даведнік / М. П. Кузьміч, М. І. Сцепаненка. – Віцебск : Віцебская абласная друкарня, 2007. – С. 121–122.
3. Нямёнаў Міхаіл Ісаевіч // Памяць: Віцебск : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад. А. І. Мацяюн ; мастак Э. Э. Жакевіч. – Мінск : БелЭн, 2003. – Кн. 2. – С. 534.
4. Фядосенка, В. С. Нямёнаў Міхаіл Ісаевіч / В. С. Фядосенка // Беларуская Савецкая Энцыклапедыя : [у 12 т.] / рэдкал.: П. У. Броўка [і інш.]. – Мінск : БелЭн, 1973. – Т. VII : Манцякі–Паддубічы. – С. 1067.
СПАСЫЛКІ
