Салавей Ларыса Фёдараўна нарадзілася 22 ліпеня 1934 года ў Оршы, беларускі мастацтвазнаўца. Заслужаны настаўнік БССР (1975). Член Беларускага саюза мастакоў з 1984 г. У 1968 г. скончыла Беларускі тэатральна-мастацкі інстытут. У 1966–81 гг. выкладчык прафесіянальна-тэхнічнага вучылішча, у 1981–87 гг. сакратар праўлення Беларускага саюза мастакоў, у 1988–92 гг. намеснік дырэктара дырэкцыі мастацкіх выставак Міністэрства культуры Рэспублікі Беларусь, у 1992–97 гг. намеснік дырэктара многафункцыянальнага выставачнага комплексу «На ростанях».

Друкуецца з 1970 г. Аўтар шэрагу артыкулаў па праблемах беларускага выяўленчага мастацтва, эстэтычнага выхавання і музеязнаўства. Ёй належаць манаграфіі пра беларускіх мастакоў Р. Кудрэвіч (1974), М. Казакевіча (1987), І. Рэя (1990), альбом «А. Гугель і Р. Кудрэвіч» (1994), творчыя партрэты мастакоў Л. Панамарэнкі, У. Кожуха, Я. Зайцава, А. Кузьміча, В. Целеша, І. Міско і іншых.

Л. Ф. Салавей – арганізатар выставак беларускіх мастакоў за мяжой, а таксама заснавальніца многіх карцінных галерэй у рэспубліцы. Аўтар каталогаў выставак: «9 мастакоў з Беларусі» (выд. у 1993 г., Італія), «7 мастакоў з Беларусі» (выд. у 1994 г., Мінск), «Каталог I міжнароднага пленэру па жывапісе імя Бялыніцкага-Бірулі» (1996) і інш.

ЛІТАРАТУРА

1. Крэпак, Б. А. Салавей Ларыса Фёдараўна / Б. А. Крэпак // Беларуская энцыклапедыя : у 18 т. / рэдкал.: Г. П. Пашкоў (гал. рэд.) [і інш.]. – Мінск : БелЭн, 1996. – Т. 14 : Рэле–Слаявіна. – С. 94–95.

2. Салавей Ларыса Фёдараўна // Памяць: Орша. Аршанскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў (гал. рэд.) [і інш.] ; склад. Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 2000. – Кн. 2. – С. 439–440.