Шадурскі Віктар Генадзевіч нарадзіўся 26 снежня 1961 года ў в. Сар'я Верхнядзвінскага раёна.

Беларускі гісторык. Доктар гістарычных навук (2000), прафесар (2002).

У 1984 годзе скончыў Беларускі дзяржаўны ўніверсітэт. Працаваў выкладчыкам, дацэнтам, начальнікам упраўлення міжнародных сувязяў БДУ.

З 1997 года – дактарант факультэта міжнародных адносін Белдзяржуніверсітэта. З 2008 года – дэкан факультэта.

Сфера яго навуковых інтарэсаў уключае актуальныя праблемы знешняй палітыкі Рэспублікі Беларусь, яе адносіны з еўрапейскімі дзяржавамі, унутраную і знешнюю палітыку Францыі, месца і ролю краін Балтыйскага рэгіёну ў сучаснай сусветнай палітыцы, глабальныя праблемы сусветнага развіцця і іх уплыў на нашу краіну.

Аўтар шматлікіх навуковых публікацый па названай праблематыцы, у тым ліку выдадзеных за мяжой, а таксама манаграфіі і навучальнага дапаможніка, рэкамендаванага Міністэрствам адукацыі Рэспублікі Беларусь. Член Вучонага Савета БДУ, старшыня рэдакцыйнай рады «Журнала міжнароднага права і міжнародных адносін».

У верасні 2013 года быў узнагароджаны Ганаровай граматай Нацыянальнага сходу Рэспублікі Беларусь. 9 лістапада 2014 года Віктар Генадзевіч Шадурскі быў узнагароджаны медалём імя Ф. Скарыны за шматгадовую плённую працу, узорнае выкананне службовых абавязкаў, вялікі асабісты ўклад у дасягненні высокіх творчых паказчыкаў у сістэме адукацыі.

ЛІТАРАТУРА

1. Шадурскі Віктар Генадзевіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2004. – Т. 17 : Хвінявічыі–Шчытні. – С. 468.

2. Шадурский Виктор Геннадьевич // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 596.

3. Шадурский Виктор Геннадьевич // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн імя П. Броўкі, 2008. – Т. 7 : Снегирь–Ящерицын. – С. 561.

4. Шадурскі Віктар Генадзевіч // Памяць: Верхнядзвінскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: У. С. Богаў [і інш.] ; уклад. А. Ф. Бубала ; мастак Э. Э. Жакевіч. – Мінск : Паліграфафармленне, 2000. – Кн. 2. – С. 246.