Шынкевіч Аляксандр Мікалаевіч нарадзіўся 8 красавіка 1956 года ў Оршы, краязнавец. Працуе мантажнікам радыёапаратуры, рэгуліроўшчыкам радыёэлектроннай апаратуры на заводзе «Чырвоны Кастрычнік» у г. Барані. 3 юнацкіх гадоў захапіўся фатаграфіяй, здымаў памятныя мясціны Аршаншчыны. Свядома займацца краязнаўчымі пошукамі пачаў з 1980-х гадоў. Падрыхтаваў рукапіс «Остатки древних поселений на Оршанщине» (1984, не выдадзены).

Комплексна даследуе Аршаншчыну. Аддае перавагу вывучэнню помнікаў гісторыі, культуры і прыроды. На працягу 30 гадоў праводзіць пошук, вывучэнне, картаграфаванне, фотафіксаванне, складанне апісанняў аб’ектаў мінуўшчыны. Склаў карты помнікаў даўніны Оршы і ваколіц. У апошні час актыўна вывучае культавыя камяні і палеанталогію Аршаншчыны. Сабраў палеанталагічную калекцыю (каля 1000 адзінак), калекцыі замалёвак і здымкаў культавых камянёў, каменных крыжоў і надмагільных збудаванняў. Асабіста выявіў шэраг гарадзішчаў, паселішчаў, курганоў, каменных крыжоў.

Прымаў актыўны ўдзел у стварэнні Аршанскага клуба гісторыі і старажытнасцяў «Повязь». Адзін з арганізатараў правядзення фотавыстаў, прысвечаных помнікам гісторыі і культуры Оршы.

Аўтар кнігі «Аршанская даўніна» (1992). Напісаў некалькі артыкулаў, прысвечаных Аршаншчыне для энцыклапедый. Падрыхтаваў : буклет пра Аршанскі Куцеінскі манастыр (1988), брашуры «Аршаншчына старажытная» (1991), «Куцеінская лаўра. Старонкі гісторыі» (1992), «Орша: погляд у мінулае» (1992), «Аршаншчына ў адлюстраваннях» (1994) і інш.

Прымаў удзел у стварэнні кнігі «Памяць» Оршы і Аршанскага раёна. У электроннай форме падрыхтаваў працу «Оршанщина: природа и старина».

Збірае фальклорную спадчыну рэгіёна. Актыўна супрацоўнічае з навучальнымі ўстановамі Оршы і Барані.

За актыўную дзейнасць узнагароджаны Граматай Прэзідыума Віцебскага абласнога савета Беларускага добраахвотнага таварыства аховы помнікаў гісторыі і культуры, Ганаровай граматай Прэзідыума рэспубліканскага савета Беларускага добраахвотнага таварыства аховы помнікаў гісторыі і культуры (1987).

ЛІТАРАТУРА

1. Каралёў, Г. На спатканне з прашчурам / Г. Каралёў // Вiцебскi рабочы. – 2006. – 31 жн. – С. 15. 2. Летапісец Аршанскай даўніны // Беларуская мінуўшчына. – 1992. – № 5. – С. 67.

3. Півавар, М. В. Шынкевіч Аляксандр Мікалаевіч / М. В. Півавар // Краязнаўцы Віцебшчыны другой паловы XX – пачатку XXI ст. : бібліяграфічны даведнік / М. В. Півавар. – Мінск : Кнігазбор, 2010. – С. 326–329.

4. Погляд у мінулае Аляксандра Шынкевіча // Аршанская газета. – 2012. – 17 сак. – С. 6.

5. Раманькова, І. Дакрануцца да гісторыі Аршаншчыны / І. Раманькова // Аршанская газета. – 2016. – 5 ліп. – С. 3.

6. Раманькова, І. М. Дакрануцца да гісторыі Аршаншчыны / І. М. Раманькова // Телеком-экспресс (Орша). – 2016. – 27 июля. – С. 21.