Слупскі Мікалай Яўгенавіч
Слупскі Мікалай Яўгенавіч нарадзіўся 2 верасня 1899 года ў в. Тродавічы Мікалаеўскай воласці Полацкага павета Віцебскай губерні ў сям'і святара.
У 1918 годзе скончыў сярэднюю школу.
У 1920–1924 гг. вучыўся ў Ваенна-медыцынскай акадэміі.
У 1925 годзе перайшоў у 1-ы Ленінградскі медыцынскі інстытут і скончыў яго.
У 1925–1929, 1932–1935 гг. – асістэнт-хірург у клініцы прафесара Джанялідзэ, у 3-м Ленінградскім інстытуце эксперыментальнай медыцыны ў прафесара Грэкава. За гэты час напісаў 8 навуковых прац.
У 1935–1941 гг. – галоўны ўрач, загадчык хірургічнага аддзялення, дырэктар школы медсясцёр Чудаўскай раённай бальніцы. За гэты час напісаў 3 навуковыя працы.
З 26 чэрвеня 1941 года – у Чырвонай арміі.
У 1941–1942 гг. – вядучы хірург у эвакашпіталі № 443 г. Пскова, эвакашпіталі № 3740 г. Бабаева. Слупскі М. Я. атрымаў раненне падчас бамбёжкі, але працягваў працаваць.
З 9 снежня 1942 па студзень 1946 гг. – галоўны хірург эвакашпіталя № 1538 г. Волагды.
У гады Вялікай Айчыннай вайны хірург Слупскі працаваў над актуальнымі пытаннямі ваеннай хірургіі. Прапанаваў метады лячэння ран мяккіх тканак, прафілактыкі і спынення крывацёкаў пад глухой гіпсавай павязкай, спосабы захавання верхніх і ніжніх канечнасцей пры цяжкай траўме (звыш 70 выпадкаў захавання ніжніх канечнасцей замест ампутацыі). Слупскі вынайшаў страўнікавы зонд для атрымання чыстага страўнікавага соку ў чалавека пры механічным раздражненні сценак страўніка і заменнік марлі ў гіпсавых павязках, які дае эканомію да 50 %.
Са студзеня 1946 года – галоўны ўрач Сестрарэцкай бальніцы.
У апошні перыяд жыцця хірург напісаў 28 навуковых прац (9 – з новымі прапановамі). Выступіў з двума дакладамі на XV Міжнародным кангрэсе фізіялогіі.
Заслужаны ўрач РСФСР (1957).
Слупскі М. Я. стаў правобразам героя аповесці Юрыя Германа «Повесть о докторе Николае Евгеньевиче».
Узнагароджаны двума ордэнамі Працоўнага Чырвонага Сцяга.
Памёр М. Я. Слупскі 25 красавіка 1964 года.
Пахаваны на Сестрарэцкіх могілках (Санкт-Пецярбург).
ЛІТАРАТУРА
1. Выдающиеся медики, уроженцы Россонского района // С милосердием в сердце: история здравоохранения Россонского района Витебской области : очерки / А. В. Пуртов. – Витебск : Витебская областная типография, 2015. – С. 266–267.
СПАСЫЛКІ
