Сцепаненка Аляксандр Васільевіч нарадзіўся 5 кастрычніка 1938 года ў Оршы, беларускі вучоны ў галіне апрацоўкі металаў.

Пасля заканчэння сярэдняй школы ў 1955 г. А. В. Сцепаненка паступае ў Беларускі палітэхнічны інстытут, які заканчвае ў 1960 г., потым 2 гады працуе інжэнерам-канструктарам на Мінскім аўтамабільным заводзе, пасля чаго паступае ў аспірантуру Беларускага палітэхнічнага інстытута. У 1965 годзе А. В. Сцепаненка паспяхова абараняе кандыдацкую дысертацыю.

У 1980 годзе А. В. Сцепаненка абраны членам-карэспандэнтам, а ў 1986 г. – акадэмікам АН БССР, у 1987 г. – віцэ-прэзідэнтам Акадэміі навук БССР.

Пад кіраўніцтвам А. В. Сцепаненкі распрацаваны арыгінальныя, высокаэфектыўныя спосабы і абсталяванне для вытворчасці парабалічных рысор, да якіх праяўлена вялікая цікавасць вядучых айчынных і замежных фірмаў.

Па выніках навуковай дзейнасці А. В. Сцепаненкі апублікавана больш за 600 навуковых прац, у тым ліку 8 манаграфій, атрымана больш за 400 аўтарскіх пасведчанняў і патэнтаў, падрыхтавана 57 кандыдатаў і дактароў навук.

Ён доўгія гады вёў актыўную навукова-арганізацыйную, навукова-педагагічную і грамадскую работу, з'яўляючыся членам спецыялізаванага савета па абароне дысертацый і навуковых саветаў, экспертнага савета Вышэйшай атэстацыйнай камісіі Рэспублікі Беларусь, рэдкалегіі навуковых часопісаў, дэпутатам Вярхоўнага Савета СССР (1989–1991 гадоў).

За выдатны ўклад у развіццё навуковых даследаванняў і стварэнне эфектыўных тэхналогій А. В. Сцепаненка узнагароджаны ордэнам Працоўнага Чырвонага Сцяга, медалём, ганаровай граматай Вярхоўнага Савета БССР, удастоены звання «Заслужаны дзеяч навукі і тэхнікі БССР».

Аляксандр Васільевіч Сцепаненка памёр 15 лютага 2005 года.

ЛІТАРАТУРА

1. Болсун, А. Белорусские имена в науке / А. Болсун // Изобретатель. – 2016. – № 4. – С. 39–48.

2. Ля штурвала беларускай навукі // Зямля Караткевіча / І. А. Яршоў, В. М. Сіднякова. – Орша : Аршанская друкарня, 1997. – С. 235.

3. Русецкий, А. В. Степаненко Александр Васильевич / А. В. Русецкий // Ученые-уроженцы Витебщины – для инновационной Беларуси / А. В. Русецкий, Н. К. Толочко. – Витебск : ВГУ им. П. М. Машерова, 2007. – С. 106–107.

4. Сцепаненка Аляксандр Васілевіч // Памяць: Орша. Аршанскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў (гал. рэд.) [і інш.] ; склад. Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 2000. – Кн. 2. – С. 441.

5. Сцепаненка Аляксандр Васілевіч // Беларуская энцыклапедыя : у 18 т. / рэдкал.: Г. П. Пашкоў (гал. рэд.) [і інш.]. – Мінск : БелЭн, 2002. – Т. 15 : Следавікі–Трыо. – С. 307.