Тычко Галіна Казіміраўна нарадзілася 11 лістапада 1955 года ў в. Сташулі Мёрскага раёна. Літаратуразнаўца, крытык. Доктар філалагічных навук, прафесар.

У 1978 годзе скончыла філалагічны факультэт Беларускага дзяржаўнага ўніверсітэта. У 1978–1979 гг. працавала настаўніцай на Шклоўшчыне. У 1979 годзе была залічана перакладчыцай польскай мовы ў Бюро міжнароднага турызму моладзі «Спадарожнік» Мінскага абкама камсамола. З 1986 года Галіна Тычко – супрацоўнік штотыднёвіка «Літаратура і мастацтва». З 1993 года працавала рэдактарам у часопісе «Полымя». З гэтага ж года Галіна Казіміраўна з'яўляецца членам Саюза беларускіх пісьменнікаў. У 1995 годзе Г. Тычко перайшла працаваць у Беларускі дзяржаўны педагагічны ўніверсітэт імя М. Танка дацэнтам кафедры беларускай літаратуры.

З 2002 года – дацэнт, потым прафесар кафедры сацыялогіі і журналістыкі Беларускага дзяржаўнага ўніверсітэта. З 2006 года – загадчык кафедры беларускай філалогіі і сусветнай літаратуры Беларускага дзяржаўнага ўніверсітэта культуры і мастацтваў. З кастрычніка 2013 года – прафесар кафедры сацыялогіі і журналістыкі інстытута журналістыкі Беларускага дзяржаўнага ўніверсітэта.

Першыя крытычныя артыкулы Галіны Тычкі былі апублікаваны ў рэспубліканскім друку ў 1984 годзе. Асноўная іх тэматыка – сучасная беларуская проза, яе маральна-этычныя пошукі, творчасць Я. Купалы. Часта выступае з рэцэнзіямі на новыя кнігі, крытычнымі аглядамі. Член Міжнароднай асацыяцыі беларусістаў. Член рэдакцыйнай калегіі выдавецтва «Беларускі кнігазбор», член саветаў па абароне дысертацый пры філалагічным факультэце і Інстытуце журналістыкі Беларускага дзяржаўнага ўніверсітэта.

Жыве ў Мінску.

ЛІТАРАТУРА

1. Саламевіч, І. У. Тычка Галіна Казіміраўна / І. У. Саламевіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2003. – Т. 16 : Трыпалі–Хвіліна. – С. 84.

2. Тычка Галіна Казіміраўна // Памяць: Міёрскі раён : гісторыка-дакументальныя хронікі гарадоў і раёнаў Беларусі / рэдкал.: Г. М. Маняк [і інш.] ; уклад. Л. А. Матэленак ; рэд. В. І. Марціновіч ; мастак Э. Э. Жакевіч. – Мінск : Беларуская навука, 1998. – С. 545.

3. Тычко Галина Казимировна // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 630.

4. Тычко Галина Казимировна // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн імя П. Броўкі, 2008. – Т. 7 : Снегирь–Ящерицын. – С. 291.

СПАСЫЛКІ

 Пісьменнікі, паэты, літаратары. Мёрскі раён

 Саюз беларускіх пісьменнікаў – Тычко Галіна Казіміраўна

 Беларускі дзяржаўны ўніверсітэт. Факультэт журналістыкі – Тычко Галіна Казіміраўна