Васілеўскі Даніла Мінавіч
Васілеўскі Даніла Мінавіч – беларускі краязнаўца, гісторык, літаратуразнаўца.
Нарадзіўся 17 снежня 1889 года ў в. Новае Сяло Шумілінскага раёна.
Скончыў Полацкую настаўніцкую семінарыю, Віцебскі настаўніцкі інстытут.
3 1910 года збіраў фальклор у Полацкім раёне.
У 1917–1919 гг. працаваў у розных установах Полацка, з 1919 года – інструктар школ на Віцебшчыне, пазней інспектар аддзела народнай асветы ў Оршы, супрацоўнік Інбелкульта.
У 1923 годзе арганізаваў Віцебскае губернскае бюро краязнаўства, з 1924 года – намеснік старшыні Аршанскага акруговага таварыства краязнаўства.
У 1930–1936 гг. – выкладчык і дэкан геаграфічнага факультэта Магілёўскага педінстытута, з 1932 года – выкладчык эканомікі на рабочым факультэце і ў палітыка-асветным інстытуце (Магілёў).
Друкаваўся ў часопісе «Школа і жыццё» (псеўданім М. Дабраведаўскі), газетах «Прыдзвінскі край», «Наша ніва» (з 1914 г., псеўданімы Шчыры, Вітэнь Д.), «Савецкая Беларусь» (з 1921 г., пад сапраўдным прозвішчам і псеўданімам Вітэнь Д.).
Даследаваў гісторыю рэвалюцыйнага руху, беларускай літаратуры 1-й паловы і сярэдзіны XIX ст., беларускага кнігадрукавання, развіцця мясцовай прэсы, розныя краязнаўчыя, гістарычныя, этнаграфічныя і сацыяльна-эканамічныя праблемы.
Выявіў у архівах і апублікаваў невядомыя каштоўныя архіўныя матэрыялы. Удзельнічаў у раскопках верхнепалеалітычнай стаянкі Бердыж.
9 снежня 1936 года незаконна рэпрэсаваны і высланы ў г. Котлас, потым працаваў буравіком у г. Варкуце. Пасля вызвалення, з 1945 года, – тэхнік-геолаг Варкуцінскага геолага-разведвальнага ўпраўлення. Апошнія гады жыў у Феадосіі. Рэабілітаваны ў 1956 годзе.
Памёр 8 снежня 1963 года.
ЛІТАРАТУРА
1. Васілеўскі, Ю. Даніла Васілеўскі – выдатны даследчык усходняй Беларусі / Ю. Васілеўскі // Аршанская газета. – 1994. – 8 верас. – С. 3.
2. Мусінская, І. Выдатны даследчык нашай мінуўшчыны / І. Мусінская // Аршанская газета. – 1999. – 21 снеж. – С. 2.
3. Мядзведзева, В. У. Археолагі-ўраджэнцы Віцебскай зямлі: працы, здабыткі, вынікі / В. У. Мядзведзева // Віцебскія старажытнасці : матэрыялы навуковай канферэнцыі, прысвечанай 90-годдзю з дня нараджэння Л. В. Аляксеева, Віцебск, 28–29 кастр. 2010 г. / рэдкал.: Г. У. Савіцкі, В. А. Шышанаў, Н. Ю. Шаркоўская. – Минск : Медисонт, 2012. – С. 421–434.
4. Саламеевіч, І. У. Васілеўскі Даніла Мінавіч / І. У. Саламеевіч // Энцыклапедыя гісторыі Беларусі : у 6 т. / рэдкал.: Б. І. Сачанка [і інш.] ; мастак Э. Э. Жакевіч. – Минск : БелЭн імя П. Броўкі, 1994. – С. 228–229.
5. Саламеевіч, І. У. Васілеўскі Даніла Мінавіч / І. У. Саламеевіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1997. – Т. 4 : Варанецкі–Гальфстрым. – С. 24.
СПАСЫЛКІ
