Віткоўскі Іван Антонавіч нарадзіўся 2 мая 1888 года ў в. Чэрчыцы Шумілінскага раёна.

Скончыў каталіцкую духоўную семінарыю (1912) і 2 курсы духоўнай акадэміі (1914) у г. Петраградзе.

У 1916–1918 гг. – вікарый (памочнік ксяндза) у Мазырскім касцёле.

З 1919 года – у Чырвонай Арміі, з 1920 года – член КПСС.

3 1921 года – на партыйнай рабоце на Віцебшчыне, у 1924–1925 гг. працаваў выкладчыкам і прарэктарам Віцебскага ветэрынарнага інстытута.

У г. Мінску з 1925 года: выкладчык Камуністычнага ўніверсітэта імя У. І. Леніна, намеснік загадчыка польскага аддзела Інбелкульта, намеснік, а потым (з 1932 г.) дырэктар Інстытута польскай пралетарскай культуры. Адначасова ў педагагічным інстытуце ўзначальваў кафедру гісторыі і выкладаў гісторыю Беларусі, СССР, Польшчы. З 1932 года – прафесар.

Аўтар прац па гісторыі нацыянальна-вызваленчага і рэвалюцыйна-дэмакратычнага руху ў Польшчы і Расіі, паўстання 1863–1864 гг.: «1863 год на Міншчыне» (1927, у суаўтарстве з А. Іановічам і Л. Лехам), «Паўстанне 1863 года і расійскі рэвалюцыйны рух пачатку 1860-х гадоў» (кн. 3, 1931) і іншых.

У 1933 годзе – арыштаваны, адбыў 3 гады зняволення ў г. Марыінск (Сібір). Пасля працаваў у Ленінградскай вобласці (г. Баравічы). У 1937 годзе паўторна арыштаваны і сасланы ў г. Мінск, дзе 27 снежня 1937 года расстраляны. Рэабілітаваны ў 1959 годзе.

ЛІТАРАТУРА

1. Витковский Иван Антонович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 259.

2. Віткоўскі Іван Антонавіч // Памяць. Мінск : у 4 кн. : гісторыка-дакументальныя хронікі гарадоў і раёнаў Беларусі / рэдкал.: Г. К. Кісялёў [і інш.]. – Мінск : Белта, 2002. – Кн. 2. – С. 552–553.

3. Карнейчык, Я. І. Віткоўскі Іван Антонавіч / Я. І. Карнейчык // Беларуская Савецкая Энцыклапедыя : [у 12 т.] / рэдкал.: П. У. Броўка [і інш.]. – Мінск : БелСЭ, 1971. – Т. ІІІ : Веды–Графікі. – С. 106.

4. Міхнюк, У. М. Віткоўскі Іван Антонавіч / У. М. Міхнюк // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1997. – Т. 4 : Варанецкі–Гальфстрым. – С. 203.

СПАСЫЛКІ

 Віткоўскі Іван Антонавіч. Рэпрэсаваныя лiтаратары, навукоўцы, работнiкi асветы, грамадскiя i культурныя дзеячы Беларусi. 1794-1991