Волкаў Мікалай Фёдаравіч нарадзіўся 26 студзеня 1931 года ў в. Нярэйша Сенненскага раёна. Беларускі вучоны ў галіне хвароб унутраных органаў, кардыялогіі.

У 1946–1950 гг. вучыўся ў Багушэўскай сярэдняй школе. Скончыў Віцебскі медыцынскі інстытут (1956). У 1956–1960 гг. працаваў галоўным урачом Валожынскай санітарна-эпідэміялагічнай станцыі, галоўным урачом Талачынскага раёна.

У 1959–1963 гг. вучыўся ў аспірантуры на кафедры шпітальнай тэрапіі Мінскага медыцынскага інстытута. У 1963 годзе абараніў кандыдацкую дысертацыю.

3 1963 года – у Гродзенскім медінстытуце, дзе прайшоў працоўны шлях ад асістэнта да прарэктара па лячэбнай частцы (1976–1997). Дацэнт (1966). У 1971–2001 гг. – загадчык кафедры шпітальнай тэрапіі. У 1975 годзе абараніў доктарскую дысертацыю «Обоснование клинического применения анаболических стероидов при заболеваниях внутренних органов». Прафесар (1976). Доктар медыцынскіх навук (1976). З 2001 года на заслужаным адпачынку.

Аўтар навуковых прац: «Гемодинамика малого круга кровообращения» (1990), «Мерцательная аритмия. Старые проблемы – новые решения» (1997), 26 рацыяналізатарскіх прапаноў і адной вынаходкі.

Узнагароджаны ордэнам «Знак Пашаны», значком «Выдатнік аховы здароўя», медалём «За доблесную працу».

ЛІТАРАТУРА

1. Бандарэвіч, В. «Інжынер» чалавечага здароўя / В. Бандарэвіч // Голас Сенненшчыны. – 2017. – 4 сак. – С. 6.

2. Волкаў Мікалай Фёдаравіч // Яны нарадзіліся на Сенненшчыне : біяграфічны даведнік / склад. А. В. Бараноўскі. – Віцебск : ВДУ імя Машэрава, 2016. – С. 27–28.

3. Волкаў Мікалай Фёдаравіч // Памяць: Сенненскі раён : гісторыка-дакументальныя хронікі гарадоў і раёнаў Беларусі / рэдкал.: У. С. Богаў [і інш.] ; уклад. С. В. Шайко ; мастак Э. Э. Жакевіч. – Мінск : Паліграфафармленне, 2003. – С. 538–539.

4. Волков Николай Фёдорович // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн, 2006. – Т. 2 : А–Герань. – С. 775.

5. Волков Николай Фёдорович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 271.