Залескі Адам Іосіфавіч нарадзіўся 4 красавіка 1912 года ў в. Кімейка Сенненскага раёна ў сялянскай сям'і. Беларускі гісторык, этнограф.

Доктар гістарычных навук (1963). Прафесар (1964). Акадэмік Міжнароднай Славянскай Акадэміі (2000).

У 1930–1931 гг. вучыўся ў Мінску на педагагічных курсах. У 1931–1937 гг. працаваў настаўнікам у Лагойскім, Дзяржынскім і Хойніцкім раёнах, завочна вучыўся ў Мінскім педтэхнікуме. У 1937 годзе скончыў гістарычна-геаграфічнае аддзяленне Мінскага настаўніцкага інстытута.

У 1937–1940 гг. – намеснік дырэктара Мінскага педагагічнага вучылішча.

Удзельнік Вялікай Айчыннай вайны. У 1944 годзе – начальнік хімічнай службы 203-га армейскага запаснога стралковага палка. За паспяхова арганізаваную пастаўку дымавых заслонаў у перыяд абароны арміі старшы лейтэнант Адам Залескі быў узнагароджаны ордэнам Чырвонай Зоркі.

У 1945–1953 гг. – выкладчык, дэкан Курскага педінстытута.

3 1953 года – загадчык сектара этнаграфіі Інстытута гісторыі, у 1957–1968 гг. – намеснік дырэктара Інстытута мастацтвазнаўства, этнаграфіі і фальклору АН БССР.У 1963 годзе абараніў доктарскую дысертацыю «Савецкі патрыятызм сялянства ва ўмовах нямецка-фашысцкай акупацыі Беларусі (1941–1944 гг.)».

У 1970–1981 гг. – загадчык сектара збору і публікацыі дакументаў і гістарычных мемуараў у Інстытуце гісторыі АН БССР.

Дзесяць гадоў працаваў старшынёй Мінскай абласной арганізацыі «Веды». 3 1994 года –старшыня Беларускага рэспубліканскага аб'яднання «Гістарычныя веды», з 2000 года – акадэмік Міжнароднай Славянскай Акадэміі.

Аўтар прац па гісторыі Вялікай Айчыннай вайны, нацыянальных адносін. Намеснік галоўнага рэдактара і адзін з аўтараў 4-га тома 5-томнага выдання «Гісторыя Беларускай ССР» (1975), рэдактар і адзін з аўтараў выдання «Нарысы ваеннай гісторыі Беларусі» (1995). Сааўтар 6-томнага выдання «Гісторыя Вялікай Айчыннай вайны Савецкага Саюза» і 12-томнага «Гісторыя Другой сусветнай вайны». Аўтар манаграфій «Быт беларускіх сялян у партызанскім краі» (1960), «У партызанскіх краях і зонах» (1962), «В тылу врага» (1974).

Апублікаваў 8 манаграфій, 8 брашур, каля 300 навуковых прац.

Узнагароджаны ордэнамі Айчыннай вайны II ступені, Чырвонай Зоркі (двойчы), медалямі.

Памёр 4 жніўня 2002 года.

ЛІТАРАТУРА

1. Даследчык партызанскай тэмы // Беларускі гістарычны часопіс. – 2002. – № 2–3. – С. 58–59.

2. Ерошенко, П. Несгибаемый Залесский / П. Ерошенко // Белорусская нива. – 2002. – 4 апр. – С. 4.

3. Жмуровский, Д. Неутомимый труженик науки / Д. Жмуровский // Народная газета. – 2002. – 4 крас. – С. 3.

4. Залесский Адам Иосифович // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн, 2006. – Т. 3 : Герасименко–Картель. – С. 598.

5. Залесский Адам Иосифович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 440.

6. Залескі Адам Іосіфавіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1998. – Т. 6 : Дадаізм–Застава. – С. 512.

7. Залескі Адам Іосіфавіч // Яны нарадзіліся на Сенненшчыне : біяграфічны даведнік / склад. А. В. Бараноўскі. – Віцебск : ВДУ імя Машэрава, 2016. – С. 55–57.

8. Залескі Адам Іосіфавіч // Памяць: Сенненскі раён : гісторыка-дакументальныя хронікі гарадоў і раёнаў Беларусі / рэдкал.: У. С. Богаў [і інш.] ; уклад. С. В. Шайко ; мастак Э. Э. Жакевіч. – Мінск : Паліграфафармленне, 2003. – С. 539–540.

9. Залескі Адам Іосіфавіч // Энцыклапедыя гісторыі Беларусі : у 6 т. / рэдкал.: Г. П. Пашкоў [і інш.]. – Мінск : БелЭн, 1996. – Т. 3 : Гімназіі–Кадэнцыя. – С. 398.

10. Залескі, А. Аб роднай Сенненшчыне / А. Залескі // Голас Сенненшчыны. – 2000. –18 студз. – С. 2 ; 1 лют. – С. 3 ; 15 лют. – С. 2–3.

11. Равеснік XX стагоддзя / падрыхт. В. Бандарэвіч // Голас Сенненшчыны. – 2017. – 29 жн. – С. 5.

12. Федарасава, В. Наш славуты зямляк / В. Федарасава // Голас Сенненшчыны. – 2002. – 2 крас. – С. 2.