Залуцкі Іосіф Віктаравіч нарадзіўся 5 верасня 1950 года ў в. Мумішкі Пастаўскага раёна, анколаг, доктар медыцынскіх навук, прафесар.

У 1969 годзе скончыў Маладзечанскае медыцынскае вучылішча, а пасля яго заканчэння служыў у радах Савецкай Арміі (1969–1971). У 1978 годзе скончыў з адзнакай лячэбны факультэт Мінскага медыцынскага інстытута. У 1978–1982 гг. працаваў клінічным ардынатарам, урачом-радыёлагам радыялагічнага аддзялення Навукова-даследчага інстытута анкалогіі і медыцынскай радыялогіі Міністэрства аховы здароўя БССР. У 1982-1985 гг. І. В. Залуцкі вучыўся ў аспірантуры па клінічнай анкалогіі, пасля чаго працаваў малодшым, а пасля старшым навуковым супрацоўнікам лабараторыі гіпертэрміі і клінічнай тэрапіі Навукова-даследчага інстытута анкалогіі і медыцынскай радыялогіі (1985–1990), старшым навуковым супрацоўнікам аддзялення рэабілітацыі, кіраўніком, затым вядучым навуковым супрацоўнікам аддзялення рэабілітацыі і брахітэрапіі (1990–1994), загадчыкам аддзялення агульнай анкалогіі і пластычнай хірургіі (з 1994).

У 1986 годе І. В. Залуцкі абараніў кандыдацкую дысертацыю, а ў 1994 г. – доктарскую. У 2000 годзе яму прысвоена навуковае званне прафесара. З гэтага ж года ён прызначаны дырэктарам ДУ «Навукова-даследчы інстытут анкалогіі і медыцынскай радыялогіі імя М. М. Аляксандрава». З 1999 года – загадчык кафедры анкалогіі Беларускай медыцынскай акадэміі паслядыпломнай адукацыі.

У 2004 годзе І. В. Залуцкі абраны членам-карэспандэнтам НАН Беларусі. Асноўны напрамак навуковай дзейнасці – распрацоўка і ўкараненне ў клінічную практыку новых метадаў лячэння і рэабілітацыі анкалагічных хворых. У апошнія гады І. В. Залуцкі быў каардынатарам працы анкалагічнай службы рэспублікі, актыўна займаўся даследаваннямі ў галіне эпідэміялогіі, прафілактыкі і ранняга выяўлення пухлін.

І. В. Залуцкі – аўтар 213 навуковых і навукова-метадычных работ, 4 манаграфій. Узнагароджаны знакам «Выдатнік аховы здароўя», Ганаровымі граматамі Міністэрства аховы здароўя Рэспублікі Беларусь, памятным медалём за самаадданую дзейнасць, якая забяспечыла выжыванне і развіццё анкалагічнай школы (Расія).

Памёр Іосіф Віктаравіч 13 чэрвеня 2018 года.

ЛІТАРАТУРА

1. Горошко, Т. Известный онколог ушёл в вечность / Т. Горошко // Пастаўскі край. – 2018. – 20 чэрв. – С. 6.

2. Залуцкі Іосіф Віктаравіч // Памяць: Пастаўскі раён : гісторыка-дакументальныя хронікі гарадоў і раёнаў Беларусі / рэдкал.: Г. К. Кісялёў [і інш.] ; уклад.: К. І. Козак, А. І. Кузняцоў ; рэд.-склад. Г. К. Кісялёў ; мастак Э. Э. Жакевіч. – Мінск : Белта, 2001. – С. 509.

3. Залуцкий Иосиф Викторович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн, 2010. – Т. 2 : Витебская область : в 2 кн. – Кн. 1. – С. 441.

4. Залуцкий Иосиф Викторович // Ученые-уроженцы Витебщины – для инновационной Беларуси : [справочное издание] / А. В. Русецкий, Н. К. Толочко. – Витебск : ВГУ им. П. М. Машерова, 2007. – С. 55–56.